Hai unhas semanas falamos no noso BLOG sobre unha das doenzas máis frecuentes na poboación xeral: a cervicalxia. Hoxe queremos afondar neste tema axudándovos a previr esta doenza a través da actividade física.

Para eliminar a tensión muscular que se xera no noso pescozo e que nos provoca dor é necesario que realicemos exercicios de estiramento e fortalecemento no día a día. Dende a nosa unidade de adestramento amosámosche unha rutina preventiva:

• Exercicios de estiramento: axudarán a aumentar a flexibilidade da musculatura, diminuíndo o risco de sufrir lesións cervicais e ampliando o rango de movemento da articulación.

1. Estiramento lateral do pescozo e da parte superior do ombreiro: dirixe a cabeza cara ao ombreiro que sintas menos cargado mentres a man dese lado tira do brazo da parte lesionada cara abaixo e por detrás das costas. Mantén esta posición durante 10 segundos. Este exercicio pode facerse sentado/a no chan, nunha cadeira ou de pé.
2. Estiramento da parte anterior do ombreiro: colócate de lado a unha parede co brazo cara atrás co cóbado estirado e a palma da man cara á parede. Colle aire e mentres o vas expulsando, vira lentamente o corpo cara ao lado contrario á parede sen separar o brazo da mesma. Mantén a postura durante 10 segundos e relaxa as articulacións.

• Exercicios de fortalecemento: a maioría dos casos de cervicalxia débense a un desequilibrio ocasionado pola debilidade de certos grupos musculares, polo que é recomendable incorporar á túa rutina este tipo de exercicios.

1. Coloca a palma da man na túa fronte exercendo presión contra ela á vez que a túa cabeza ofrece resistencia no sentido contrario.
2. Déitate boca abaixo e mantén a mirada en liña coa columna. Leva os brazos cara atrás e cara arriba deixando que as puntas dos pés se apoien sobre o chan. Agora, mantendo a tensión nos brazos, levanta a cabeza e as cervicais mentres mantés a mirada cara ao chan. Mantén esta postura 10 segundos e relaxa.

Queres coñecer máis exercicios que che axuden a previr lesións nas túas cervicais? En García e Lestón contamos con profesionais do adestramento que estudarán o teu caso e elaborarán unha rutina adaptada ás túas necesidades e obxectivos para que ningunha doenza afecte á túa calidade de vida. Contacta connosco sen compromiso!

Sentes que a túa parella só che dá unhas faragullas de atención? Este fenómeno coñécese como “breadcrumbing” (deixar migallas de pan).

Os vínculos sociais (parella, familia, amigos, etc.) requiren de traballo, compromiso e responsabilidade afectiva, pero en moitas ocasións algún destes factores adóitase descoidar chegando a causar dano emocional á outra persoa. Un exemplo diso é o “breadcrumbing”, que fai referencia a un patrón de comportamento onde unha parte da relación lle dá á outra o que lle sobra a modo de reforzo intermitente para que se manteña vinculado/a a ela/el baixo uns mínimos coa esperanza de que, nalgún momento, esa situación poida estabilizarse e mellorar.

Un exemplo claro disto? Unha persoa que, nun principio, presta moita atención á súa parella e, de súpeto, comeza a tratala de xeito distinto ou desagradable, deixa de responderlle ás mensaxes, de interesarse pola súa vida, etc. Isto provoca na outra parte unha sensación de incerteza, malestar, frustración e mesmo dependencia.

Para que poidas identificar este comportamento, queremos amosarche as condutas máis habituais:

• Parece disposto/a a ter encontros en persoa ou realizar plans, pero anúlaos a última hora.
• Algúns días móstrase interesado/a e falador/a, pero despois deixa de chamar ou responder ás mensaxes durante un longo período de tempo.
• Evade temas que impliquen compromiso a futuro.
• É ambiguo/a ao falar contigo. É dicir, cando se lle propón avanzar dalgún modo na relación, responde con evasivas.
• Non adoita querer falar de sentimentos.
• Non quere estar contigo pero tampouco sen ti, polo que non remata coa relación.

Sénteste identificado/a con algún destes sinais? Dende García e Lestón dámosche algúns consellos para saber como actuar ante este tipo de situacións:

• Trata de ser obxectivo/a: pode que as túas emocións estean nubrando a túa parte máis racional polo que es incapaz de ver que os actos desa persoa están a facerche dano. Neste punto tes que pensar nos feitos e preguntarte: “É este o tipo de relación a que quero?” “Son feliz nela?” “Gustaríame cambiar algo?”

• Expresa os teus sentimentos: intenta expresarlle as túas emocións e pensamentos á outra persoa, pode que o erro se atope nunha falta de comunicación.

• Elixe o que mellor che conveña: valora se che compensa estar cunha persoa que, ao mellor, nunca che poderá dar o que buscas nunha parella.

Desvincularse deste tipo de relacións pode ser moi complicado e pode requirir a axuda de especialistas da saúde mental. En García e Lestón contamos con profesionais da psicoloxía que te acompañarán durante todo este proceso e che darán os mellores consellos para afrontalo. As migallas, ao lixo!

Do mesmo xeito que a dor de costas, as doenzas nas cervicais son outro dos problemas máis frecuentes que sofren os/as nosos/as pacientes cada día. Por iso, dende García e Lestón dámosvos algúns consellos e exercicios para evitar e tratar unha das molestias máis comúns na nosa sociedade: a cervicalxia.

Esta patoloxía coñécese como a dor que afecta á noca e ás vértebras cervicais e que pode chegar a estenderse ao pescozo, cabeza ou extremidades superiores. Esta afección limita o rango de movemento e pode vir acompañada de náuseas, vómitos, debilidade, trastornos visuais, vertixe, formigo, zunidos nos oídos e, nun 1% dos casos, pode chegar a provocar disfunción neurolóxica.

As principais causas da cervicalxia adoitan deberse a dúas circunstancias: as sobrecargas musculares provocadas por hábitos desaconsellables e posturas cotiás ou as contusións de gran impacto. Malia que estas son as razóns máis habituais, existen outros factores que poden provocar esta doenza como: artrose cervical, lesións do disco intervertebral, tumores, infeccións, etc.

O tratamento desta patoloxía recae na fisioterapia, sendo a terapia manual, a rehabilitación e os programas de exercicios destinados a fortalecer os músculos da zona os grandes aliados dos/as pacientes. O prognóstico é xeralmente bo se se permanece activo/a e se seguen as indicacións do/a profesional.

Dende a nosa unidade de fisioterapia, dámosche algunhas recomendacións para evitar que unha lesión cervical torne nunha posible cervicalxia.

• Aplicar calor na zona durante 15 minutos e varias veces ao día.
• Evitar movementos que provoquen dor, non facer repouso total en cama e non cargar peso.
• Tras a primeira semana, e se a dor mellora, podes empezar a estirar a zona. Algúns exercicios cervicais de flexibilidade que poderás realizar para mellorar e aliviar a dor, son os seguintes:

1. Rotación de pescozo: rota o pescozo 90° ata que o queixo toque un dos ombreiros. Descansa uns segundos e repite o movemento cara ao lado contrario. É importante que realices este exercicio de forma lenta e pausada.
2. Rotación de ombreiros: coas costas rectas, xira os ombreiros nun movemento circular, primeiro cara adiante durante uns segundos e logo cara atrás.
3. Inclinación lateral de pescozo: inclina todo o pescozo cara a un lado, tentando que a orella toque o ombreiro. Non forces o estiramento, detén o movemento cando notes que o músculo se estira sen chegar a sentir dor. Volve á postura inicial e repíteo en sentido contrario.

En García e Lestón contamos con profesionais da fisioterapia que estudarán o teu caso en profundidade e aplicarán o mellor tratamento adaptado ás túas necesidades para reducir o teu malestar e recuperar canto antes a túa calidade de vida. Contacta connosco sen compromiso!

De seguro que algunha vez te decataches da importancia que ten a saúde dos teus pés na túa vida diaria por culpa dunha doenza. Moitas veces non somos conscientes do valor que ten o coidado do noso corpo ata que sufrimos unha lesión.

Un calzado inadecuado, unha mala pisada, unha caída… moitos poden ser os factores que causen un dos problemas máis habituais nos nosos pés: a escordadura de nocello. Pero, que sexa algo frecuente non significa que non lle prestemos a atención necesaria. Se non se trata correctamente, esta lesión pode desenvolver afeccións para sempre. Algunhas persoas con escordaduras reiteradas ou graves poden chegar a ter dor e debilidade a longo prazo.

Os exercicios de rehabilitación son esenciais para que a articulación cure por completo e non volva sufrir novas doenzas. Dende García e Lestón, amosámosche algúns consellos que podes levar á práctica para asegurar unha pronta recuperación.

• Exercicios de amplitude do movemento: débense realizar pasadas as 72 horas.

1. Alfabeto: cos dedos do pé traza as letras do abecedario alentando o movemento do nocello en todas as direccións. Repíteo entre unha e tres veces.
2. Abalo de xeonllo: sentado/a nunha cadeira, move o xeonllo lentamente dun lado a outro mentres mantés o pé apoiado no chan. Continúa con este movemento durante 2 ou 3 minutos.

• Exercicios de estiramento: para recuperar a flexibilidade e a mobilidade durante unha doenza.

1. Coloca unha toalla ou banda elástica na parte superior da planta do pé e suxéitaa polo dous extremos. Tira dela cara a ti suavemente mentres mantés o xeonllo estirado. Sostén esta posición durante 15 ou 30 segundos.
2. Do papo da perna: ergueito/a e coas mans apoiadas nunha parede á altura dos ollos, sitúa a perna que queres estirar un paso por detrás. Mantendo ese talón no chan, flexiona o xeonllo da perna que está adiante ata que sintas o estiramento na outra. Aguanta entre 15 e 30 segundos.

Estes son algúns dos exercicios que se poden levar a cabo durante unha recuperación de nocello. Con todo, lembra que só son recomendacións básicas e que é necesario acudir a un especialista que estude o teu caso e escolla o mellor tratamento para a túa lesión.

En García e Lestón contamos con profesionais da fisioterapia e o adestramento que seleccionarán as mellores técnicas para tratar a túa afección e evitar secuelas posteriores, tanto con terapias manuais como con táboas de exercicios de rehabilitación. Non o dubides máis e dá o seguinte paso para mellorar a túa calidade de vida!

Algunha vez sufriches un episodio de estrés ou ansiedade por non poder asistir a unha festa ou evento importante? Dende García e Lestón contámosche como se denomina este trastorno e como podes superalo.

Coa chegada da era dixital, as relacións sociais aumentaron ata tal punto que é habitual mostrar parte da túa vida e ver a dos/das demais a través dunha pantalla, creando unha sociedade conectada as 24 horas do día. Malia que as redes sociais cubriron moitas necesidades á hora de poder comunicarnos, tamén espertaron ou potenciaron outras, sobre todo no ámbito da saúde mental.

Un exemplo disto é o aumento do número de persoas que padecen a síndrome FOMO (do inglés “fear of missing out”), un trastorno psicolóxico que se caracteriza por experimentar unha sensación de ansiedade e preocupación por perder experiencias, eventos ou momentos importantes ou gratificantes da vida doutros/as. Do mesmo xeito que ocorre con outras fobias, o temor a non ser partícipe de algo xera malestar e ansiedade e, neste caso, o/a paciente padece unha sensación de illamento social e de perda de oportunidades valiosas.

Para evitar esta patoloxía, é necesario xestionar os sentimentos e pensamentos negativos que abarcan a nosa mente, ao igual que o medo a non pertencer ou ser querido/a. Dende a nosa unidade de psicoloxía, propoñémosche algunhas ferramentas para poder mitigar os síntomas desta doenza:

• Identificar a síndrome: aceptar que é natural que apareza esta emoción e comprender que non sempre podemos estar presentes en todo momento.

• Limitar o uso de redes sociais: establecer límites de tempo e ser selectivos/as nos contidos que seguimos pode axudar a diminuír a comparación cos/cas demais.

• Enfocarte nas túas propias experiencias: centrarnos no que temos e nas nosas propias vivencias permítenos cambiar a nosa perspectiva. Debemos pensar que se non podemos acudir a un evento, seguramente podemos utilizar ese tempo en facer algo máis beneficioso para a nosa saúde.

• Acudir a un/unha profesional: existen diferentes tratamentos que poden axudar a reducir os síntomas do FOMO, recuperando a calidade de vida e o benestar dos/das pacientes.

Cres que ti ou alguén da túa contorna pode estar a sufrir este trastorno? En García e Lestón contamos con profesionais da psicoloxía que estudarán o teu caso en profundidade e che amosarán técnicas efectivas para xestionar o medo ao rexeitamento social para que volvas a gozar do teu tempo sen pensar no dos/das demais. Contacta connosco sen compromiso!