A semana pasada demos a benvida a unha nova estación, o inverno. Para moitas persoas significa o comezo da mellor época do ano, non porque coincida coa chegada das festas de Nadal, senón porque poden practicar o seu deporte favorito.

E é que algunas actividades comezan agora a súa tempada: esquí, snowboard, skeleton… Moitas delas levan consigo un incremento da probabilidade de sufrir lesións, non só polas condicións meteorolóxicas (como a neve ou o xeo), senón polo risco do propio deporte (caídas, nivel de dificultade, falta de precaución, etc.).

En García e Lestón somos expertos/as no tratamento de lesións deportivas, por iso, neste blog queremos centrarnos nunhas das tempadas nas que máis demanda recibimos. A continuación, a nosa unidade de fisioterapia daravos unha visión xeral sobre as doenzas máis comúns en deportes de inverno e que medidas podes tomar para previlas:

• Lesións de xeonllo: o maior número de incidencias que recibimos nestas datas, e as máis graves, son das articulacións inferiores, xa que nelas recae todo o peso e a presión durante os exercicios. Son habituais as doenzas no ligamento cruzado anterior, así como lesións nos meniscos ao momento de virar bruscamente a perna mentres se está en contacto co chan.

• Luxación de ombreiro e fractura de clavícula: son frecuentes, sobre todo no snowboard e o esquí, xa que se producen por un forte traumatismo directo nunha caída ou ao golpear un obstáculo co ombreiro.

• Polgar de esquiador/a: sucede cando un/unha esquiador/a dobra a man cara atrás para suxeitar o pau de esquí nunha caída. Isto fai que o ligamento da articulación rache e se fracture o polgar nalgúns casos.

Agora que xa coñeces cales son as principais lesións que podes sufrir se vas practicar un deporte de inverno, os/as nosos/as profesionais daranche unha pequena guía para evitalas e gozar da actividade sen perigo:

1. Revisa a previsión meteorolóxica: é importante que esteas ao tanto do tempo que vai facer, sobre todo en zonas de montaña.
2. Practica deporte en compañía: en actividades de risco é moi recomendable que nunca vaias só/soa, porque, se sofres algún accidente e non contas coa axuda de ninguén, pode ser moi perigoso para a túa saúde e seguridade.
3. Descansa e hidrátate regularmente: o esgotamento muscular é unha das principais causas de lesión.
4. Realiza unha rutina de quecemento: os músculos tensan cando baixa a temperatura e os vasos sanguíneos contráense, polo que realizar exercicios de quecemento que acondicionen o teu corpo para a actividade física é de vital importancia.
5. Revisa o estado do teu equipo deportivo.
6. Se sofres unha caída mentres esquías, solta os paus, así evitarás a lesión de polgar.
7. Sé precavido/a: non te esforces máis aló dos teus límites e non practiques deporte en zonas que non coñeces ou que están demasiado illadas.

En García e Lestón queremos coidarte e que te coides! Se sofres calquera lesión practicando o teu deporte favorito, os/as nosos/as profesionais da fisioterapia estudarán o teu caso e daranche o tratamento que necesites, ademais dunha atención e seguimento personalizado. Contacta connosco sen compromiso!

O Nadal xa aterrou nas nosas vidas. As rúas énchense de luces, os máis pequenos/as agardan a chegada de Papá Noel, comezan as primeiras compras, reunións familiares… Estas datas son consideradas para moitos/as as favoritas do ano pola ilusión e a alegría. Pero non todo o mundo vive estas festas do mesmo xeito: existen persoas que o único sentimento que experimentan é a tristeza.

Dende García e Lestón contámosche a cara oculta desta época e que podes facer para evitala.

A depresión do Nadal (ou depresión branca), malia que non é considerada un trastorno psicolóxico, é un estado de ánimo negativo e temporal cara todo o que caracteriza esta festividade. Os síntomas máis habituais son o rexeitamento deste período do ano, ansiedade, illamento ou irritabilidade.

As razóns que poden desencadear este estado depresivo poden variar en cada caso. Os factores máis comúns son:

• Perda dun ser querido: as reunións familiares fan que acentúe máis a ausencia de persoas, sobre todo no primeiro e segundo ano de dó.

• Diminución da exposición á luz solar: un abastecemento mínimo de luz provoca cambios nos ritmos naturais do organismo. A falta de vitamina D pode ser o causante dunha alteración no estado de ánimo.

• Estrés por todas as obrigacións pendentes: agasallos que mercar, comidas que organizar, ceas ás que asistir… Esta época pode provocar altos niveis de estrés por todas as tarefas que se adoitan facer e que, en moitas ocasións, as persoas realizan non por gusto, senón por presión social.

Pero, que se pode facer para evitar que a tristeza e a melancolía acaben co noso espírito do Nadal? Dende a nosa unidade de psicoloxía dámosche algúns consellos para poñer en práctica durante estas datas:

• Organiza todas as tarefas con tempo e non as deixes para o último momento.

• Delega ou reparte con familiares e amigos/as aquelas actividades que non che fagan sentir ben, como organizar os eventos, mercar os agasallos, decorar a casa ou preparar as comidas.

• Antepón o teu benestar e tranquilidade: reduce as túas expectativas e esixencias para evitar calquera presión engadida.

• Realiza actividades de autocoidado: é moi importante dedicar tempo a un/unha mesmo/a. Fai aquilo que desexes: saír a pasear, quedar con amigos/as…

• Acude a un/unha profesional que che axude a atopar a mellor solución para afrontar os teus problemas.

En García e Lestón contamos cun equipo de psicoloxía que escoitará as túas inquietudes e seleccionará o mellor tratamento para recuperar a túa calidade de vida durante este Nadal. Lembra que non estás só/soa! Contacta connosco sen compromiso.

O teu fillo/a quéixase constantemente dunha dor na cadeira? Moito ollo! Esta doenza pode estar relacionada coa sinovite de cadeira. Dende García e Lestón contámosche todo sobre esta enfermidade.

A sinovite de cadeira é unha inflamación do tecido que forma a capa máis superficial da cadeira, a membrana sinovial. Isto produce un exceso de líquido articular que distende a articulación e provoca unha diminución da mobilidade. Esta afección é a causa principal da dor de cadeira e a culpable, na maioría dos casos, de que nenos/as de entre 3 e 10 anos presenten coxeiras.

Pero non debes alarmarte se o teu pequeno/a padece esta patoloxía, xa que é un proceso benigno, leve e autolimitado, que co tratamento adecuado curará nun máximo de dúas semanas (entre 7 e 10 días).

As causas da sinovite de cadeira a día de hoxe descoñécense, pero existen certos factores que poden aumentar a probabilidade de aparición como sufrir unha infección vírica nas vías respiratorias superiores ou ter unha caída ou golpe. Adoita ser frecuente que semanas anteriores a padecer esta enfermidade, o/a paciente tivese unha infección de gorxa, gastrointestinal ou un traumatismo indirecto na zona.

Os nenos/as que padecen esta enfermidade adóitanse queixar de non poder correr nin andar por sentir dor na zona da ingua, na parte dianteira da coxa ou mesmo no xeonllo. Con todo, a sinovite de cadeira non adoita presentar moitas complicacións graves, as máis comúns son:

• Dor nun lado da cadeira.
• Coxeira.
• Dor de xeonllo e/ou coxa.
• Febre baixa, menos de 38.º

Como comentamos anteriormente, esta patoloxía debería desaparecer co paso dos días. Nestes casos, o tratamento está dirixido a aliviar a dor e diminuír a inflamación da cadeira, polo que recomendamos o seguinte:

• Repouso: malia que poida ser difícil que un neno/a non se mova, hai que tratar de evitar que camiñe o menos posible.

• Terapia física: dentro da fisioterapia, existen múltiples técnicas e métodos cos que se pode controlar os síntomas que aparecen pola sinovite de cadeira, os máis comúns son:

• Crioterapia: coa finalidade de xerar unha diminución da temperatura nos tecidos e reducir a inflamación, aplícase frío sobre a articulación.

• Aplicar calor: cando a inflamación da zona diminuíu considerablemente, recoméndase aplicar calor na zona da cadeira para aumentar o fluxo sanguíneo e reducir a dor, ademais de favorecer unha pronta recuperación.

• Estiramentos: é aconsenllable que un/unha profesional cree unha táboa de exercicios para evitar o entumecemento muscular despois dun período prolongado de repouso.

En García e Lestón contamos con profesionais da fisioterapia que estudarán o caso dos teus pequenos/as e seleccionarán o tratamento que máis se adecúe ás súas necesidades, para que poidan recuperar a súa calidade de vida o antes posible. Que o movemento non pare!

Estás a buscar un novo desafío para rematar ou empezar o ano? Se este é o teu caso, dende García e Lestón propoñémosche un dos retos deportivos máis habituais: participar nunha carreira.

Este tipo de competicións supoñen un gran esforzo físico e mental e poñen a proba a nosa capacidade de resistencia, adaptación, dedicación e disciplina. Por iso, moitas persoas ao longo da súa vida teñen o soño de poder terminar unha maratón, pero non co obxectivo de gañar, senón de demostrarse a eles/elas mesmos/as que son capaces de superar os límites que se propoñan.

Con todo, como comentamos anteriormente, as altas esixencias que implica esta actividade deportiva requiren dun acondicionamento previo, polo que, dende as nosas unidades de adestramento e fisioterapia, dámosvos algúns consellos para preparar a vosa próxima carreira:

• Realiza unha revisión médica: antes da inscrición, debes pedirlle a profesionais da saúde e da fisioterapia que revisen o teu estado físico. O primeiro é saber se o teu corpo é capaz de resistir este tipo de esforzo e, en base a iso, establecer unhas distancias límites.

• Busca información sobre o percorrido: é moi importante que coñezas o tramo que vas correr, saber onde se atopan os desniveis e os puntos de avituallamento para poder organizar mellor o teu ritmo e tempos.

• Planifica o teu adestramento: crea unha rutina de preparación física. Non só debes incluír diferentes tramos e distancias, é esencial que realices exercicios de forza, mobilidade e flexibilidade para previr lesións e mellorar a túa pisada. Tamén é recomendable que aumentes a intensidade e duración das túas carreiras gradualmente. Aínda así, o incremento da quilometraxe non debería superar o 10% dunha semana a outra. O teu obxectivo debe ser alcanzar a distancia necesaria 4 semanas antes do evento, para despois diminuír o ritmo do teu adestramento e manter o teu corpo preparado para o día da competición.

• Coida a túa alimentación e mantente hidratado/a: parte do éxito depende da túa nutrición. Debes contar cunha alimentación equilibrada onde non falten vitaminas, minerais, proteínas graxas e hidratos de carbono. Lembra tamén que a intensidade da actividade require unha perda de auga e sales minerais, polo que é moi importante hidratarse antes, durante e despois da carreira para mellorar o teu rendemento.

• Descansa: este tipo de actividades supoñen un gran esgotamento físico, por iso é moi importante que teñas un tempo de descanso e de recuperación. O aconsellable son 8 horas de sono.

• Elixe un calzado axeitado: os teus pés van ser os que te leven cara á meta. Utiliza unhas zapatillas que se adapten ás túas necesidades e aporten unha boa suxeición e amortecemento. Lembra que o día da competición non debes estrear nin roupa nin calzado para unha maior comodidade!

En García e Lestón contamos con profesionais do adestramento e da fisioterapia que che axudarán a planificar a túa carreira e facer unha posta a punto completa. Non o dubides máis e contacta connosco sen compromiso!

Existe algo máis terrorífico que a noite de Halloween? Polo momento, a época dos disfraces tenebrosos ou as cabazas sinistras chegou á súa fin, pero, por desgraza, hai algunhas persoas para as que o medo non remata o 1 de novembro. Dende García e Lestón contámosche o peor pesadelo de calquera neno/a: os terrores nocturnos.

Este tipo de trastornos do sono denomínanse tamén parasomnias e caracterízanse pola aparición de condutas explosivas de carácter anómalo e irracional que se orixinan mentres a persoa está a durmir. Esta afección baséase en sufrir episodios recorrentes de espertares bruscos que provocan unha sensación de angustia que se adoita exteriorizar con berros e axitación psicomotriz.

Este trastorno afecta maioritariamente aos/ás nenos/as entre os 4 e 10 anos. De feito, a Asociación Española do Sono (ASENARCO) estima que un 40% da poboación sufriu algunha vez un episodio de terrores nocturnos durante a súa infancia. Malia esta alta incidencia nos/as máis pequenos/as, esta alteración do sono adóitase superar xeralmente antes de entrar na adolescencia.

Se es pai ou nai e o/a teu/túa fillo/a sofre este tipo de episodios nocturnos, non debes entrar en pánico. Dende a nosa unidade de psicoloxía dámosche algunhas recomendacións para previr e tratar este tipo de trastornos:

• Evitar a sobreestimulación: aconséllase que os/as pequenos/as se deiten cedo e sigan unha rutina diaria. Débese evitar que se vaian á cama alterados/as ou sen un momento previo de tranquilidade, xa que os seus niveis de ansiedade poden incrementarse e interromper na conciliación do sono. Tamén pode axudar a descansar mellor unha cea lixeira e non utilizar o teléfono móbil previamente.

• Manter a calma: a paciencia será a túa mellor aliada durante os terrores nocturnos. É necesario que os pais e nais acheguen tranquilidade e seguridade para acougar ao/á neno/a. Se está a vivir un episodio, déitate ao seu lado e agarda ata que volva durmir.

• Acudir a un/unha profesional da psicoloxía: a psicoterapia é unha boa opción cando se necesita axuda externa e acompañamento na xestión emocional. Cando se viven trastornos con este tipo de incerteza na súa aparición, pódense experimentar sentimentos de tristeza, medo e desesperanza. Nestes casos, é moi recomendable acudir a un/unha especialista que oriente e axude tanto aos pais/nais como aos/ás fillos/as.

En García e Lestón contamos con profesionais da psicoloxía que axudarán a todo o núcleo familiar a superar esta etapa e volver a recuperar a calidade de vida cada noite. Non o dubides máis e contacta connosco!