Todo sobre os carbohidratos. Son realmente os malos da película?

Durante moitos anos estendeuse a famosa idea de que os carbohidratos non sempre son bos para a nosa saúde. Isto é realmente así? Esta afirmación que leva tempo circulando por todos os medios é una xeneralización e non debemos tomala ao pé da letra. Explicámosche por que neste blog.

En primeiro lugar, debemos saber que os carbohidratos son un dos tres nutrientes principais para a nosa alimentación, xunto coa proteína e as graxas. Ademais, son o maior aporte enerxético para o noso organismo, incluído o cerebro. Agora ben, dentro deles podemos diferenciar varios tipos:

  • Azucres: son coñecidos tamén como carbohidratos simples porque se atopan na súa forma máis básica. Poden ser agregados, como nas lambetadas ou nos refrescos (cuxo consumo debemos evitar o máximo posible), ou naturais, como os que teñen as froitas ou verduras.

  • Amidóns: son carbohidratos complexos que están feitos de moitos azucres simples que o noso corpo precisa descompoñer. Podemos atopalos no pan, nos cereais integrais (na súa versión de gran completo) e na pasta, así como nalgunhas verduras, nas patacas, nos chícharos ou no millo.

  • Fibra: son tamén carbohidratos complexos como os amidóns. O noso corpo non pode descompoñela, polo que fai que nos sintamos máis saciados á hora de comer alimentos que a conteñan en grandes cantidades.

Ademais, as alimentacións altas en fibra axudan a previr problemas estomacais ou intestinais como o estrinximento e axuda ao control do colesterol e do azucre no sangue. Podemos atopar a fibra en alimentos que proveñen principalmente de plantas como as froitas, verduras ou as sementes.

Deste xeito, podemos afirmar que os carbohidratos mantéñennos saudables e dannos enerxía tanto física como mental, posto que conteñen vitaminas, minerais e antioxidantes que atrasan o envellecemento celular.

Tendo isto en conta, que pasaría se reducimos ou eliminamos o seu consumo? Malia que moitos discursos defenden que os carbohidratos son malos para a nosa saúde, moitos deses argumentos só se centran naqueles que están presentes nos ultraprocesados pero, como xa vimos, podemos atopalos nunha multitude de alimentos saudables.

De facelo, perderemos a obtención de vitaminas esenciais no noso día a día e o noso corpo comezará a descompoñer a graxa para obter a enerxía que precisa. Isto, levado ao extremo, pode producir mareos, dores de cabeza ou fatiga.

De seguro que, agora que xa coñeces un pouco mellor o mundo dos carbohidratos, xa non os ves como unha ameaza real pero si como algo que debemos controlar e vixiar de que alimentos os obtemos. En García e Lestón temos ao mellor equipo na nosa área de nutrición para axudarche nesa tarefa.

CORRER OU CAMIÑAR? UNHA DECISIÓN MÁIS IMPORTANTE DO QUE PENSAS

Algunha vez quixeches facer exercicio de cardio pero non te decantas por un? Pensaches en saír á rúa a facer deporte pero non che gusta moito correr? Prefires camiñar pero non tes a seguridade de poder obter moitos resultados? Pois debes saber que esta idea é errónea e hoxe ímosche explicar cales son as diferenzas reais entre estas dúas actividades para saber cal debes elixir:

Determinar se correr é mellor que camiñar e viceversa depende, principalmente, de tres factores: o aspecto da nosa saúde que queremos coidar, o noso estado físico e, o máis importante, as nosas preferencias individuais. Pode ser que para unha persoa moi activa, correr sexa a mellor forma de liberar endorfinas e sentirse ben pero, para unha máis sedentaria que comeza a facer deporte ou cunha mala condición física, isto pode ser a peor decisión, pois non vai gozar da actividade e a vai vela como un castigo ou unha obriga.

Como diferenciamos os efectos de correr dos de camiñar? Debemos analizar unha serie de aspectos. Se poñemos a atención no noso sistema cardiovascular, ambas actividades son beneficiosas para nós, posto que reducen o risco de exceso de colesterol, hipertensión ou diabetes. Con todo, se camiñamos, deberá ser a un ritmo medianamente intenso, de non ser así, o nivel de gasto de enerxía será moito menor para o noso corpo e os resultados moito menos destacables.

Por outra banda, se queremos priorizar as nosas articulacións, podemos dicir que é preferible camiñar, posto que xeramos menos impacto no noso tren inferior, como os xeonllos e os nocellos. Ademais da intensidade, temos que ter sempre en conta o terreo no que estamos a desenvolver a actividade. Unha superficie moi irregular pode ser prexudicial para nós.

Por último, se abordamos os beneficios psicolóxicos, malia que ambas opcións son recomendables, a acción de correr pode axudarnos máis neste aspecto. Isto é así porque produce unha maior cantidade de endorfinas, unha sustancia que xera o noso cerebro e que se relaciona coa sensación de benestar e o alivio da dor.

Correr e camiñar son dúas grandes alternativas para manternos activos/as e debemos elixir a que máis nos guste e a que máis nos achegue para acadar os nosos obxectivos. Ambas actividades axúdannos a coidar do noso organismo e ter unha vida moito máis saudable. En García e Lestón temos ao mellor equipo de persoas profesionais que poden axudarche a atopar a opción máis óptima e acorde ás túas necesidades para manter activo o teu corpo.

A fisioterapia. Un apoio máis para o tratamento do Parkinson

O Parkinson é unha doenza cuxo número de casos incrementou nos últimos anos. Trátase dun trastorno do movemento que é progresivo e que se orixina cando as neuronas non producen a cantidade necesaria dunha substancia coñecida como dopamina. Deste xeito, ademais de afectar ao sistema nervioso tamén terá as súas consecuencias sobre os músculos e o nivel de actividade da persoa que o padeza.

Malia que é unha afección moi coñecida, polo momento non existe unha cura,  polo que o/a doente deberá convivir con ela de forma crónica. Con todo, existen moitos xeitos de reducir os seus efectos e de lograr unha mellor calidade de vida durante a doenza, neste blog falámosche dun concreto.

Pero primeiro debemos abordar cales son os síntomas principais para poder recoñecelos. Ademais do xa característico tremor dos membros, pode que esta doenza se manifeste doutros xeitos:

  • Lentitude nos movementos
  • Rixidez nas extremidades
  • Trastornos da postura
  • Cambios na voz cara un ton máis débil
  • Perda de expresividade na cara
  • Debilitación do sentido do olfacto
  • Trastornos do sono
  • Ansiedade ou depresión

Como xa che comentamos, o Parkinson é unha doenza que non se pode curar e que empeora co paso do tempo. Como reducir o seu impacto na nosa saúde? A fisioterapia é unha opción máis que recomendable.

Esta disciplina axuda á recuperación da marcha, á superación dos bloqueos do movemento, a facilitar cambios na postura corporal, a manter a mobilidade muscular ou a diminuír as doenzas físicas.

Deste xeito, procúrase que a persoa doente gañe autonomía e coñeza os mecanismos necesarios para aplicar no seu día a día. Por outra banda, grazas a técnicas como a termoterapia, por exemplo, o/a fisioterapeuta tamén poderá axudar a evitar a retracción dos músculos.

Todo isto, por suposto, dependerá dunha valoración previa por parte da persoa profesional, quen comprobará o estado do/da doente e aplicará os exercicios necesarios dependendo das súas condicións.

Pode que o camiño non sexa doado, pero ter ao carón persoas que che poidan axudar no proceso é imprescindible. En García e Lestón sabémolo, por iso poñemos á túa disposición, non só a nosa área de fisioterapia, tamén as de nutrición, adestramento e psicoloxía para que nada che poida impedir gozar do teu día a día.

BLOG PSICOLOXÍA: SÍNDROME DE BURNOUT. A SENSACIÓN DE QUEIMARSE NO TRABALLO

Algunha vez idealizaches unha situación que estaba por suceder ou un traballo no que tiñas moitas ganas de comezar, pero as túas expectativas non se cumpriron en ningún caso? Existía unha diferenza bastante notable entre o que imaxinabas e a realidade e sentes que estás queimado/a? Esta sensación é común e ten un nome: a Síndrome de Burnout.

Este trastorno caracterízase, principalmente, polo estrés desencadeado polo mundo laboral e por unha mala resposta individual cara el. Con todo, non debemos deixalo a un lado, posto que mesmo a OMS o cataloga como un risco laboral. É común que a Síndrome de Burnout apareza naquelas persoas que escollen a súa profesión de xeito vocacional.

Ademais dos altos niveis de estrés, a carga de traballo excesiva, a ausencia de autonomía, as malas relacións laborais e a falta de formación para desenvolver as distintas tarefas do traballo son as principais causas que poden facer aparecer esta síndrome. Existen, ademais, certos factores de personalidade que inflúen nela, como son o conformismo, as inseguridades, a baixa autoestima e o perfeccionismo.

Que senten as persoas que sofren este trastorno? Hai unha serie de manifestacións comúns:

  • Sensación de esgotamento, fracaso e/ou impotencia
  • Menor realización persoal
  • Nerviosismo xeneralizado
  • Dificultade para concentrarse
  • Dor de cabeza
  • Taquicardias
  • Insomnio
  • Irritabilidade
  • Baixo rendemento
  • Comunicación deficiente

A Síndrome de Burnout caracterízase por ser progresiva, é dicir, vai medrando pouco a pouco co tempo e pode afectar a longo prazo á hora de tomar decisións ou resolver problemas que nun primeiro momento poden parecer sinxelos. Pero, este trastorno pode derivar en consecuencias máis graves como o abuso de substancias, a depresión ou a psicose.

O papel principal para a prevención desta síndrome teno a empresa, que debe analizar os problemas existentes así como proporcionar ferramentas e solucións para que a persoa empregada poida desenvolver as súas tarefas da mellor forma posible. Por outra banda, é necesario que esta modifique as súas expectativas respecto ao traballo cara unhas máis realistas.

No caso de que sexa demasiado tarde, levar a cabo un tratamento psicolóxico centrado na psicoeducación e o autocoñecemento é fundamental para xestionar o estrés ou mellorar a autoestima. Así mesmo, debe centrarse en traballar a resiliencia, que é a capacidade de superar experiencias traumáticas. En García e Lestón podes atopar ao mellor equipo de persoas profesionais no campo da psicoloxía, que che axudarán a identificar o que che está a pasar e a poñerlle solución.

Alimentación vexetariana e completa. Non é un mito.

Cada vez é máis popular levar unha alimentación vexetariana sen consumo de carnes nin pescados. Ademais das causas ideolóxicas que nos poden levar a aplicala, este tipo de nutrición axuda a previr ou tratar condicións relacionadas co noso benestar, como as doenzas cardiovasculares, a aterosclerose, a diabetes tipo 2 e a hipertensión.

Con todo, moitas persoas cren que este xeito de consumir a comida non é sostible no tempo e que incluso pode chegar a ser prexudicial. Neste blog contámosche se isto é así e que posibles inconvenientes debes ter en conta para evitalos.

Para comezar, debes saber cal é a diferenza entre ser vexetariano/a e vegano/a. Mentres as persoas vexetarianas só suprimen os produtos de orixe animal na súa alimentación, as persoas veganas adaptan isto ao seu estilo de vida, consumindo roupa, calzado ou mesmo cosméticos respectuosos cos animais.

Unha das principais preocupacións á hora de aplicar este xeito de consumir comida á nosa rutina é a obtención de proteína e vitamina B-12, pero non hai nada do que alarmarse. Hai unha serie de produtos de orixe non animal que achega unha gran cantidade de proteína. No primeiro posto temos os garavanzos, que son ricos en fibra, polo que nos axudan tamén co noso tránsito intestinal. As lentellas, moi típicas da época outonal e invernal, a soia, o arroz integral, a quinoa ou os cacahuetes tamén son unha moi boa opción.

Respecto á vitamina B-12, este é o principal risco das persoas que levan unha nutrición vexetariana ou vegana. A ausencia desta vitamina pode causar anemia e trastornos neuropsiquiátricos que poden chegar a ser severos e irreversibles. Consumir ovos e lácteos non asegura o aporte necesario desta vitamina, polo que sempre é recomendable que unha persoa experta che indique unhas pautas para a suplementación en función da túa idade e fisioloxía.

Agora xa sabes que, consumindo os alimentos axeitados e tomando os coidados necesarios, unha alimentación afastada do consumo animal é posible. Non obstante, é moi recomendable contar co apoio dunha persoa especialista na nutrición. En García e Lestón atoparás ao mellor equipo profesional que te guiará cara unha alimentación totalmente saudable.

Dá o salto! Dinamiza o teu adestramento

Cando comezamos coa nosa rutina de exercicios, guiámonos moitas veces polo que nos é familiar: correr, camiñar ou montar en bicicleta para traballar o cardio, ou máquinas e pesas para adestrar a nosa musculatura e aumentar a forza. Con todo, en moitas ocasións deixamos atrás un tipo de exercicio que é tremendamente eficaz: os saltos.

Engadir saltos no noso adestramento é un moi bo xeito de traballar a potencia do noso tren inferior, posto que son estes músculos os que realizan o esforzo de, xa sexa no sitio ou cara unha plataforma que pode variar de tamaño e altura. Este exercicio ten cabida en calquera rutina e recoméndase, especialmente, nas que funcionan por intervalos de alta intensidade (HIIT) e en adestramentos pliométricos, nos que se aplica a maior forza posible no menor tempo efectuando movementos dinámicos.

Así a todo, os saltos non son recomendados nos casos nos que a persoa que está realizando os exercicios teña problemas na columna vertebral, como poden ser as hernias, ou complicacións nas articulacións, como a artrite.

Cales son as principais vantaxes que nos poden proporcionar os saltos no noso adestramento? Engadir novos exercicios supón unha maior variedade e, se son destas características, aumentan a intensidade. Ademais destes beneficios:

  • Estimula o metabolismo.
  • Activa o sistema linfático e facilita a eliminación de líquidos.
  • Mellora a nosa axilidade, velocidade e coordinación.
  • Axuda a ter unha mellor postura corporal e equilibrio.
  • Traballa tanto os músculos como a resistencia, posto que facemos exercicios de forza e cardio á vez.
  • Eleva os nosos niveis de serotonina.
  • Mellora a absorción de calcio, o que supón unha maior masa ósea.

Un exercicio co que podes comezar a introducirte neste tipo de actividades son os burpees, nos que, partindo dunha postura vertical, pasamos a unha sentada para apoiar as mans no chan e facer unha flexión. Rematada esta primeira parte, recollemos as pernas para volver á posición de sentada e saltar cara arriba. Os saltos levando os xeonllos ao peito son tamén eficaces, sinxelos e moi útiles; así como as sentadas con salto. Moi parecidas son as zancadas con salto, malia todo, non son recomendadas para calquera, posto que é necesario ter equilibrio dabondo.

Engadir saltos na nosa rutina de adestramento é moi efectivo, posto que son un exercicio moi completo para conseguir todos os nosos obxectivos. Non obstante, hai que ter en conta as nosas condicións físicas e lesións previas para evitar certas doenzas ou perigos derivados da súa práctica. En García e Lestón contamos coas mellores persoas profesionais para guiarte cara un adestramento máis óptimo e cara unha vida saudable.

Que a tendinite non sexa máis un contratempo. Apóiate na fisioterapia

Algunha vez saíches a correr e, ao pasar as horas, tiñas unha forte dor no talón de Aquiles? Fixeches un gran esforzo levantando peso e dóeche o brazo? Realizas traballos físicos e cústache mover unha parte do corpo que utilizas a diario? É posible que teñas unha tendinite nalgunha extremidade ou articulación. Non te preocupes, pode pasar en moitas ocasións se realizamos algún tipo de actividade física nunhas condicións que non son as adecuadas ou cun equipo e vestimenta incorrectos.

En resumo, unha tendinite é unha inflamación ou irritación dun tendón. Prodúcese pola repetición excesiva dun movemento, como nos pode pasar se o noso traballo consiste en accións reiteradas e constantes, como a limpeza, ou por unha mala realización do mesmo. Levar a cabo unha técnica incorrecta pode sobrecargar o tendón e isto fai que teñamos unha tendinite.

Que podemos sentir ao sufrir este tipo de doenza muscular? Que o diferenza das maniotas? A tendinite presenta unhas características comúns para todas aquelas persoas que a sofren:

  • Dor xorda, principalmente ao mover a extremidade ou articulación afectada

  • Sensibilidade na zona

  • Inchazo

  • Perda de forza

  • Posibilidade de que aparezan hematomas

  • Rixidez á mañá

  • Dor intensificada en repouso

Un gran xeito de poñerlle fin a esta doenza tan molesta e limitadora é mediante a fisioterapia. Na gran maioría dos casos, a inflamación trátase con terapia manual, pero pódese chegar a complementar con punción seca ou cun tratamento de ondas de choque. Ademais, a persoa profesional que nos atenda poderá pautarnos unha serie de exercicios e estiramentos para fortalecer os nosos músculos e, desta forma, reducir o malestar físico.

Ademais, a fisioterapia facilita a recuperación da mobilidade e fortalece o tendón e as zonas próximas a este. Desta forma, a probabilidade a recaer neste tipo de lesións nesa zona xa curada redúcese, debido ao exercicio que realizamos previamente. En García e Lestón contamos cun equipo de fisioterapia formado polas mellores persoas profesionais que che axudarán a poñerlle fin ás túas doenzas da forma máis axeitada para ti.

Parálise do sono. Pesadelo ou realidade?

Algunha vez espertaches tras un longo sono e non te puideches mover? Mesmo sentías algunha presenza “paranormal”? Non te preocupes, non é un espírito, probablemente padeceras un episodio de parálise do sono e é algo máis común do que podes chegar a crer.

Este evento non desexado, prodúcenos principalmente a imposibilidade de movernos ou falar cando tratamos de quedarnos durmidos/as ou antes de espertar. Podemos atravesalo cos ollos pechados ou abertos e dura dende algúns segundos ata minutos.

Existen distintos tipos de parálise do sono, nalgúns casos podemos sentir presión no peito; noutros podemos escoitar ou imaxinar cousas que realmente non están sucedendo como pasos ou a presenza dunha persoa ao carón. Inclusive podemos ter a sensación de que caemos ou xiramos. Non tes por que alarmarte, case todo o mundo viviu a parálise do sono algunha vez na súa vida, e esta non pon en risco a nosa saúde, pero si que pode xerarnos certos nervios ou ansiedade.

Queres saber por que se produce esta situación? Polo xeral, está relacionada con non durmir as horas necesarias, así como coa alteración das horas do sono ou mesmo con durmir cara arriba. Problemas como o estrés, a ansiedade, a depresión e as dores de cabeza pódennos levar a sufrir este evento.

Non existe un tratamento específico, pero ter un horario para durmir estable e uns bos hábitos do sono axudan a evitar a parálise do sono. Aquí uns consellos:

  • Mantén unha constancia á hora de ir durmir e espertar todos os días da semana.

  • Crea un entorno cómodo no que poder descansar.

  • Procura ter exposición á luz durante o día e reducila pola noite.

  • Evita as sestas longas e a unha hora tardía.

  • Non fagas ceas pesadas e non consumas cafeína.

  • Non durmas con luces e aparatos electrónicos como o ordenador ou a televisión acesos.

  • Fai exercicio durante o día.

Agora xa sabes que non tes nada do que ter medo cando padezas un episodio de parálise do sono. Con todo, se precisas de axuda para controlar o teu estrés ou ansiedade e para regular o teu descanso, o equipo de psicoloxía de García e Lestón conta coas mellores persoas profesionais para axudarche en todo o que precises e conseguir uns hábitos saudables cos que evitar este tipo de problemas.

Camiño a Samaín. Come saudable sen ningún tipo de medo

Outubro é un mes de novidades: caen as follas, cambia o horario, baixan as temperaturas e novos alimentos chegan ao noso menú diario. Comezamos tamén a conta atrás cara Samaín, unha festividade na que a comida comparte protagonismo co terror pero, non por iso debemos deixar atrás a nosa vida saudable.

Para manter unha boa alimentación, independentemente do día ou a festa que se celebre, hoxe traémosche un listado de alimentos cos que podes preparar unha gran cantidade de pratos propios de outono equilibrados e sinxelos.

En primeiro lugar temos os legumes. Lentellas e garavanzos son os grandes protagonistas desta época do ano. De todos os elementos vexetais, estes son os que presentan un maior contido de proteína, polo que son realmente beneficiosos para nosa saúde.

Que pode ser máis típico do outono en Galicia que o Magosto e as castañas? Poden comerse asadas ou mesmo crúas, son un froito seco moi rico en potasio, beneficioso para a circulación e a presión arterial. Ademais, trátase dunha comida que sacia moito pola súa abundancia en hidratos de carbono. Podes comela como snack durante esta época do ano.

Coa chegada do frío, unha boa opción é unha crema quente de cabaza. Este alimento tan característico do Samaín ofrece moitas posibilidades á hora de cociñar, que ademais de sinxelas, son boas para a nosa saúde. A cabaza reforza as nosas defensas, coida o noso sistema cardiovascular, o aparato urinario e os riles; é antioxidante e contén as vitaminas A, C e E, calcio e magnesio.

Propio desta estación tamén é a busca e a recolleita de cogomelos. Son moi sinxelos de combinar nas nosas comidas e proporciónannos hidratos de carbono e proteína, así como unha serie de vitaminas, calcio, potasio e ferro. Como podemos engadir os cogomelos na nosa alimentación? Unha boa forma é con risottos ou revoltos de verduras e ovos; pero tamén son un gran acompañante para pescados como a merluza ou a carne.

Por último, a froita máis característica do outono son as mandarinas, populares pola súa facilidade á hora de pelalas e pola gran cantidade de vitaminas antioxidantes que posúe. Comer un par delas cobre aproximadamente o 50% das necesidades diarias de vitamina C. Este froito, similar á laranxa, apórtanos moita fibra que nos axuda a previr o estrinximento, doenzas cardiovasculares ou o cancro de colon. As mandarinas son, polo tanto, unha merenda ou comida de media mañá perfecta para este outono.
Pode que outubro sexa un mes de cambios e incluso medo coa chegada do Samaín, pero vén cunha serie de alimentos saudables con moitas posibilidades de receitas. Se queres conseguir unha alimentación equilibrada e completa este outono, en García e Lestón atoparás ao mellor equipo profesional que che axudará e te guiará no proceso, e se che apetece coñecer receitas terroríficas pero saudables, non perdas esta publicación da nosa nutricionista.

Como combater a sarcopenia. Dálle protagonismo aos exercicios de forza

Ter unha vida saudable e activa non serve unicamente para gozar máis do día a día, senón para anticiparnos ás doenzas que poidamos padecer nun futuro e garantir unha maior facilidade para afrontalas chegado o momento. Unha das afeccións ás que que lle podemos gañar esta carreira é a sarcopenia.

Esta doenza baséase na perda de masa, forza e funcionamento dos músculos e afecta, especialmente, ás persoas de idade avanzada. Adoita manifestarse debido ao paso dos anos, pero tamén inflúen outros factores como a ausencia de actividade física ou unha mala alimentación. Ademais destas principais causas, existen outras patoloxías que poden contribuír ao desenvolvemento da sarcopenia:

  • A resistencia á insulina.

  • Doenzas crónicas, sobre todo as relacionadas con procesos inflamatorios.

  • Cancros.

  • Alteracións nutricionais.

  • Déficits hormonais.

  • Envellecemento do sistema nervioso central.

Como saber se padecemos sarcopenia? O síntoma máis común é a sensación de debilidade, pero outros indicativos de que temos esta afección poden ser: dificultade para levantarse dunha cadeira, menor velocidade á hora de camiñar ou caídas reiteradas. En moitas ocasións, as persoas que sofren sarcopenia tamén presentan unha perda de peso non xustificada. Outras consecuencias derivadas desta enfermidade poden ser o aumento no risco de ter unha fractura ou lesión, hipertensión, obesidade ou diabetes, o que supón un empeoramento notable da calidade de vida.

Que podemos facer para afrontar esta doenza? Unha das chaves fundamentais do seu tratamento é o deporte, concretamente os exercicios de forza. Estas actividades permitirannos fortalecer a nosa masa muscular. Para realizalas, ben podemos utilizar elementos de resistencia externa como unhas pesas ou unhas bandas elásticas, ou ben podemos usar o noso propio peso corporal.

Por outra banda, a sarcopenia vai asociada a unha perda da independencia ao non poder realizar as accións do día a día. Por iso, o adestramento funcional tamén resulta moi importante. Grazas a el, poderemos practicar exercicios que se adapten ás nosas condicións físicas, polo que é un bo xeito de recuperar a mobilidade. Unha actividade moi característica deste tipo de adestramento son as sentadas: imitando a acción de sentar, estaremos activando un gran grupo de músculos e conseguindo moi bos beneficios.

O equipo de adestramento de García e Lestón está formado polas persoas profesionais indicadas para que afrontes a sarcopenia do mellor xeito posible, ben sexa grazas aos nosos grupos de adestramento funcional ou aos exercicios de forza. As nosas áreas de nutrición, psicoloxía e fisioterapia tamén che axudarán a reducir o impacto desta doenza na túa saúde.