A práctica deportiva podémola realizar de múltiples xeitos, de forma individual ou con máis xente, cunha longa ou curta duración… Igualmente, hai persoas que só adestran en espazos exteriores e outras no interior, pero hoxe ímosvos falar dos beneficios destes dous tipos de adestramento e por que combinar ambos é o ideal.

Os exercicios outdoor abranguen o deporte realizado ao aire libre e as actividades organizadas nas que existe o contacto coa natureza.

Entre os beneficios desta práctica podemos destacar que:

• Non é estrita, podes modificala e facer múltiples variacións doadamente.
• O contacto coa natureza e respirar aire fresco e puro mellora o estado de ánimo e a motivación, á vez que diminúe os niveis de tensión.
• Presenta unha gran variedade de posibilidades como o ciclismo, running, patinaxe… e ata podes probar novos deportes!
• Permíteche gozar dun espazo bastante amplo, o que reduce o contacto con outra xente, recomendable na actual situación de pandemia.

Pola contra, o indoor ten lugar en espazos pechados onde os elementos externos non dificultan a súa realización e as ferramentas dispoñibles o complementan, ademais:

• Permite o adestramento específico sobre unha parte do corpo.
• Os resultados son máis efectivos ao traballar con obxectivos puntuais.
• Cantas veces viches pola ventá que chovía e deixaches o deporte para outro día? O clima non é un problema.

Xa coñecemos os beneficios destas dúas prácticas pero, aínda non estás seguro/a de como podes combinalas?

Nós recomendámosche empregar a outdoor como unha forma de gozar do aire libre e relaxarte vendo a paisaxe, complementándoa coa indoor ao carón dun adestrador/a persoal. O feito de ter profesionais á túa disposición permíteche realizar os exercicios que mellor se adapten a ti e traballar así dun xeito máis específico.

No Centro Integral de Saúde e Benestar García e Lestón contamos co mellor equipo profesional en adestramento persoal. Conseguiremos que facer exercicio non che dea preguiza nin o deixes para outro momento. A que estás agardando para comezar este camiño co mellor asesoramento?

As dores de cabeza, como as migrañas, poden causar molestias que chegan a durar horas ou mesmo días. No blog de hoxe amosámosche cales son as principais causas deste tipo de doenzas e como a fisioterapia pode axudar a remitilas.

O primeiro que debemos coñecer é que a migraña é unha enfermidade que padecen moitas persoas e cuxos síntomas poden presentarse de xeito frecuente. Caracterízase por ser unha dor aguda e punzante nun lado da cabeza ou en ambos, pero pode traer consigo outros efectos prexudiciais como náuseas, vómitos, sensibilidade á luz ou aos sons, vertixe ou mareos.

Ademais, ver puntos de luz, escintileos ou puntos negros poden ser indicativos de que imos sufrir unha migraña e preséntanse, normalmente, un pouco antes de padecer a dor de cabeza. Pon ollo a esta sintomatoloxía para estar alerta ante un posible gromo!

Por outra parte, é coñecido que as causas polas que podemos sufrir destas dores son variadas:

• Estrés.
• Menstruación.
• Falta ou exceso de sono.
• Antecedentes familiares.
• Cambios no clima: temperatura, vento, etc.
• Consumo de certos alimentos como chocolate, alcohol ou cafeína.

A fisioterapia axuda a recoñecer estas causas e a aliviar as dores e as molestias provocadas pola migraña. Algúns dos tratamentos máis comúns son:

• Osteopatía cranial.
• Corrección da postura mediante exercicios específicos ou tratamentos combinados con disciplinas como Pilates Terapéutico ou adestramento persoal.
• Liberación dos puntos de gatillo.
• Osteopatía estrutural, centrada nas cervicais.
• Técnicas viscerais en diafragma, estómago, colon, útero ou vexiga entre outros.

Como non podía ser doutro xeito, a nosa visión global e integral da saúde e do benestar lévannos a contarche tamén como combater a migraña a través da dieta. Evita a inxesta de alimentos con altos niveles de histamina coma o aguacate, o chocolate, a cervexa, o cava, o marisco ou o leite e os lacteos.

Se ti sofres dalgunha cefalea ou migraña recorda que en García e Lestón dispoñemos dun equipo de fisioterapeutas disposto a axudarche a combater esas dores e a alcanzar o teu benestar.

A fisioterapia é unha parte esencial no coidado do noso benestar, e é por iso que non debemos descoidar este tratamento nin nos momentos máis complicados.

Ante a situación pandémica que atravesamos é común que moitas persoas non poidan saír da súa casa, simplemente non queiran ou non lles sexa posible desprazarse con facilidade. A fisioterapia a domicilio é unha resposta lóxica e natural a este problema e permite que os grupos de risco da covid-19 poidan recibir un tratamento adecuado na comodidade do seu fogar. Por exemplo:

• Pacientes de cancro.
• Cun sistema inmune débil.
• Persoas de idade avanzada ou con problemas de mobilidade.
• Con diabetes ou obesidade.
• Con patoloxías respiratorios ou enfermidades cardíacas.

Recibir estes coidados na casa reduce a posibilidade de contraer o virus a todos estes grupos de risco, polo que a opción de fisioterapia a domicilio e na comodidade do fogar será unha máis de todas as respostas que estamos a dar, dende García e Lestón, ás necesidades que xorden a raíz da situación actual. Do mesmo xeito, esta modalidade de fisiotarpia é a mellor alternativa para persoas dependentes, con escasa mobilidade, con algunha discapacidade ou doentes de lesións ou operacións que precisen de repouso.

Que o/a fisioterapeuta poida levar un seguimento máis personalizado do paciente, que teña a posibilidade de coñecer e comprobar a súa rutina e proporcionarlle indicacións, que o paciente se sinta moito máis cómodo ou que se reduzan os tempos de recuperación ao deixar de lado o desprazamento ata a clínica, son só algúns dos múltiples beneficios que podemos atopar neste tipo de servizos.

Nestes momentos o coidado da túa saúde é máis importante que nunca, dende García e Lestón somos conscientes e por iso ofrecemos o noso servizo de fisioterapia domiciliaria para que nada te free e para facer da túa recuperación algo máis doado, seguro, rápido e eficaz. Porque o compromiso que temos establecido co benestar dos nosos pacientes non se vai romper con nada.

O cancro é unha enfermidade que pode provocar en nós moitos cambios e alteracións tanto físicos como psicolóxicos, por iso é importante tratar de coidar o noso corpo e a nosa mente no proceso. Neste blog ímosche ensinar como a boa alimentación, a práctica de exercicio, a fisioterapia e o coidado psicolóxico poden achegar beneficios durante esta doenza.

Comezando pola alimentación, é importante aclarar que unha persoa con cancro non vai ter as mesmas necesidades nutricionais que unha persoa que non o padeza. O paciente de cancro necesitará consumir unha serie de alimentos que lle axuden a fortalecerse para poder afrontar os efectos tanto da enfermidade como do tratamento, polo que é importante que recorra a profesionais para saber como alimentarse debidamente. Unha boa nutrición pode axudar a:

• Conservar o peso corporal.
• Manter un bo nivel de enerxía.
• Soportar mellor as secuelas do tratamento.
• Previr infeccións.

Por outra banda, o exercicio físico tamén aporta vantaxes á hora de afrontar as consecuencias provocadas pola enfermidade ou o tratamento:

• Axuda a diminuír a dor.
• Reduce a fatiga, o cansazo, as náuseas e vómitos.
• Diminúe o risco de trombose.
• Mellora a ansiedade, a autoestima e o estrés.

Do mesmo xeito a fisioterapia provoca moitos beneficios no paciente de cancro posto que, cos exercicios adecuados, pode axudar a fortalecer a capacidade respiratoria, combater as alteracións no sistema nervioso ou recuperar a mobilidade en zonas operadas do corpo.

Por último, para poder afrontar esta enfermidade é moi importante coidar a saúde mental e preparase psicoloxicamente para afrontar as adversidades. Para isto é moi importante buscar refuxio nos seres queridos e en profesionais da psicoloxía, continuar traballando na medida do posible, e dedicar tempo a actividades de ocio.

Dende García e Lestón estamos con todos os pacientes que atravesan esta complicada enfermidade e ofrecemos os nosos servicios do Centro Integral de Saúde e Benestar para axudar a calquera persoa que se atope nesta situación a levar esta doenza o mellor posible.

A importancia de coidar a túa saúde mental ante a pandemia.

A saúde mental é un aspecto que debemos ter moi en conta para o noso benestar físico e psicolóxico. Recentemente entramos na terceira vaga da covid-19, e os efectos negativos das duras restricións da primeira e a segunda vaga vanse acumulando en nós, orixinando en moitos casos problemas de saúde mental como depresión ou ansiedade.

Do mesmo xeito que acudimos a outros/as profesionais por outro tipo de doenzas, debemos pedir axuda ante a aparición de síntomas que poidan indicar que, efectivamente, necesitamos atención psicolóxica.

Pero cales son as causas principais, no contexto pandémico, da aparición de problemas de saúde mental? Algunhas poden ser:

• Risco de contacto co virus.
• Longos períodos de confinamento.
• Loito ante a perda de familiares e amigos/as.
• Excesiva exposición ás noticias relacionadas ca pandemia.

Estes problemas poden afectar a toda a poboación, pero existen certos grupos vulnerables que son máis propensos a desenvolver problemas psicolóxicos.

• O persoal sanitario, polo alto risco de contaxio e a presión laboral.
• As persoas maiores, pola súa debilidade fronte ó virus, o medo a contaxiarse ou a soidade á que se enfrontan nos períodos de confinamento.
• A poboación máis moza, ante a incerteza do seu futuro.

Estas cuestións poden provocar en nós a aparición de trastornos de ansiedade, depresión ou estrés postraumático. Entón, que factores me poden indicar que preciso de axuda? Incerteza, angustia, problemas para respirar, tristeza continuada, distracción recorrente, apatía ou pensamentos relacionados coa morte ou o suicidio poden ser indicativos de que precisamos de atención psicolóxica de inmediato.

Ademais, é importante prestar atención a un dos grupos vulnerables máis esquecidos en canto ó impacto psicolóxico da pandemia, os/as adolescentes. Como adiantabamos antes, a incerteza de cara ó futuro é un dos factores chave na aparición de problemas psicolóxicos nun sector da poboación que está en pleno proceso formativo, de autodescubrimento e de interacción social.

A inestabilidade académica, as restricións comunicativas, a posible recesión económica ou as dificultades para acceder ó mercado laboral poden provocar cambios de ánimo, irritabilidade, insomnio, pensamentos suicidas ou mesmo incitar ó consumo de drogas ou alcohol na poboación moza. Debemos estar atentos/as á aparición de sinais e afrontalas sen xerar conflitos.

Se experimentas algún destes indicativos, non dubides en buscar apoio sanitario, agora máis que nunca debemos preocuparnos pola nosa saúde. Dende a nosa área de Psicoloxía do Centro Integral de Saúde e Benestar García e Lestón podemos axudarche a superar as doenzas que deixa en nós a pandemia e a coidar a túa saúde mental.