Non teñas mala pata este verán: descubre como tratar e previr a escordadura de xeonllo

A chegada do verán é algo que tanto adultos como nenos/as desexan. O bo tempo, ir á praia, vacacións… moitos son os factores que fan que esta época do ano sexa a máis esperada.  Estas condicións inflúen nun maior número de persoas practicando deporte, pero o incremento da actividade física tamén leva consigo un aumento no número de lesións e doenzas. Por iso, dende García e Lestón querémosvos amosar unha das máis comúns, para que coñezades como tratala e previla.

A escordadura de xeonllo prodúcese cando un dos catro ligamentos que suxeita a articulación sofre un estiramento repentino e brusco ou se desgarra total ou parcialmente. Esta lesión pódese deber a un golpe ou a unha flexión, torsión ou movemento violento do xeonllo, co pé apoiado firmemente no chan ou despois dun salto.

Os síntomas desta doenza adoitan ser moi concretos e aparecen xusto no momento no que se produce, o que facilita a súa identificación:

• Sentir un estalo na articulación (pode incluso escoitarse).
• Dor continua e intensa ao tentar camiñar ou ao tacto.
• Redución da capacidade de movemento e rixidez na mesma.
• Inflamación.
• Posible aparición dun negrón na zona afectada.

Esta lesión pode dificultar a calidade de vida da persoa que a sofre, e máis nesta época do ano cando aparecen constantemente plans de lecer que poden implicar o movemento desta parte do corpo (nadar, xogar ao pádel, ao baloncesto, facer sendeirismo, etc.). Por iso, queremos darvos algúns consellos para previla:

• Manter un bo estado físico.
• Fortalecer e tonificar a musculatura do xeonllo.
• Realizar exercicios de propiocepción e estabilidade: a propiocepción é un tipo de adestramento necesario para facer que o corpo se adapte a calquera cambio: saltar un charco, mudar a dirección, un tropezón, etc.
• Utilizar calzado axeitado.
• Controlar o peso corporal.
• Realizar estiramentos antes e despois de facer deporte.

O tratamento para a escordadura de xeonllo depende do ligamento que se viu afectado e a súa gravidade. No caso máis leve, basta con utilizar xeo e xeonlleiras articuladas que a manteñan no seu sitio. En casos máis graves, será necesario o uso de muletas ou mesmo cirurxía. En ambas as dúas situacións, é necesario un período de fisioterapia posterior á retirada da escaiola ou da operación. O tempo de recuperación nestes casos pode ser de catro ata oito semanas.

En García e Lestón contamos cun equipo de profesionais da fisioterapia que te acompañarán durante todo o proceso de rehabilitación para devolverche canto antes a calidade de vida.