Que o paso do tempo non restrinxa a túa vida: a importancia dos estiramentos

A medida que imos envellecendo, o noso corpo vaise debilitando, diminuíndo o noso rango de movemento e a nosa capacidade para realizar diferentes actividades diarias. Para retardar e mesmo mellorar esta situación, é necesario fortalecer o corpo con rutinas de adestramento adaptadas á idade adulta. O problema atópase cando moitas persoas prefiren non darlle importancia polo esforzo que supón ou por outros factores.

Dende García e Lestón animamos a todas aquelas persoas da terceira idade a dar un primeiro paso cara a actividade física, introducindo estiramentos no seu día a día. Este tipo de exercicios teñen unha faceta terapéutica, facéndolle sentir máis independente á xente que o practica.

Realizar estiramentos cada mañá axuda a levar a cabo con máis facilidade tarefas cotiás como vestirse, ducharse, coller cousas do chan, etc. A pesar de que este quecemento se aconsella a calquera idade e sobre todo antes dun adestramento, é moi recomendable nos/as adultos/as polos seus múltiples beneficios, algúns deles son:

• Aumento da flexibilidade: como comentamos anteriormente, os estiramentos axilizan os seus movementos outorgándolles unha maior flexibilidade, o que lles permitirá gañar máis autonomía e aumentar a súa autoestima.

• Incremento do rango de movemento: non só melloran a forma na que se moven, senón tamén o seu rango. Por exemplo, levantando máis dunha soa perna para subir escaleiras.

• Mellora da circulación: manter os músculos activos favorece o fluxo sanguíneo, algo de especial interese na idade adulta xa que, a medida que envellecemos, este tende a retardarse. Con este tipo de exercicios chega máis sangue aos músculos, fortalecéndoos e evitando dores relacionadas co sedentarismo e algunhas enfermidades -como ictus, pé diabéticos, tromboses, etc.-

Dende a nosa unidade de adestramento escollemos algúns estiramentos moi útiles e sinxelos que podedes practicar na casa ou ensinarllos aos/ás vosos/as maiores:

• Círculos coa cadeira: ponte de pé coas pernas abertas á altura dos ombreiros e a man na cintura. Comeza movendo a túa cadeira realizando círculos no sentido das agullas do reloxo. Fai este movemento seis veces e logo cambia de sentido.

• Apertura de brazos: tamén de pé e coas pernas abertas á altura dos ombreiros, entrelaza as túas mans por detrás das costas á altura do cóccix e mantente mirando de fronte. Aos poucos  segundos vai levantando os brazos tan alto como poidas, detente cando notes o estiramento sen que teñas dor. Respira profundamente e volve á posición inicial.

• Queixo ao peito: este exercicio pódelo realizar de pé ou sentado/a. Coloca os teus brazos diante de ti cos dous cóbados tocándose e as palmas das mans xuntas mirando cara arriba. Despois leva as túas mans á cabeza e empúxaa suavemente cara abaixo coa intención de que chegue ao peito, pero sen tocalo. Tes que notar un lixeiro estiramento no pescozo e os ombreiros. Mantén esta posición durante 15 segundo e reincorpórate.

En García e Lestón contamos con profesionais do adestramento que che axudarán a realizar unha táboa de estiramentos adaptada ás túas necesidades, para que nin o paso do tempo poida reducir a túa calidade de vida!