A praia: un bo sitio para adestrar neste verán?

Cando chega o verán, moitos/as de nós aproveitamos os días solleiros para cambiar a nosa rutina e ir ata a costa. Este cambio nos nosos hábitos pode que altere o compromiso cos nosos adestramentos pero, quen dixo que a praia non pode ser o noso novo ximnasio? A maioría das veces, non contamos cun centro de adestramento no lugar onde pasamos as nosas vacacións. Por iso, é esencial aproveitar a contorna que nos rodea e practicar deporte dunha forma diferente.

Dende García e Lestón ensinámosche algúns exercicios para seguir coidando da túa calidade de vida este verán:

• Quecemento: empeza por preparar o teu corpo para o adestramento. Podes camiñar dende 5 a 10 minutos a ritmo lixeiro. Aconséllase facelo pola area que está húmida xa que é máis estable e así poderás evitar lesións. Unha vez remates, tes que activar os músculos e articulacións que vas utilizar mediante estiramentos.

• Sentadas: abre as túas pernas ata o ancho dos teus ombreiros, flexiona os xeonllos e baixa o corpo mantendo as costas ergueitas e evitando inclinarte cara adiante. Este exercicio pódelo facer con ou sen peso, a maior carga, maior fortalecemento dos músculos.

• Elevacións de xeonllos: sitúa as pernas ao ancho das túas cadeiras e leva o peso do corpo cara a unha das pernas, sube e baixa o teu xeonllo oposto o máis alto que poidas.

• Pranchas de antebrazos: colócate boca abaixo coa punta dos pés e os antebrazos apoiados na area. Sube o teu corpo ata lograr unha liña recta dende os ombreiros aos nocellos e aguanta esta posición de 30 segundos a 1 minuto.

• Jumping Jacks: este exercicio é ideal para fortalecer costas, glúteos e pernas. Primeiro, ponte de pé coas pernas xuntas e os brazos a ambos os dous lados. Dobra lixeiramente os xeonllos e salta. Mentres o fas, separa as pernas ao ancho do ombreiros, estira á súa vez os brazos sobre a cabeza e retoma a posición inicial.

A praia é un espazo que nos permite facer multitude de actividades. Por iso, podes aproveitar para alterar a túa rutina de exercicios con deportes como o voleibol, fútbol, xogar ás raquetas, nadar, pádel surf, kaiak, ioga…

Por outra banda, aínda que adestrar na praia sexa saudable, é necesario realizar un quecemento previo e estiramentos ao rematar e lembrar que nesta época do ano as temperaturas son elevadas. Por iso, dende García e Lestón dámosche algúns consellos:

• Evita facer exercicio no exterior dende as 12h ata as 16h.
• Hidrátate constantemente.
• Aplica protector solar.
• Utiliza gorras ou lentes de sol.
• Refréscate no mar cando acabes os exercicios.

En García e Lestón contamos cun equipo de profesionais do adestramento que che axudarán a escoller os mellores exercicios para practicar este verán na area. Contacta connosco sen compromiso!