Non deixes que o teu día a día se paralice. Como nos axuda a fisioterapia para o estrinximento?

Algunha vez paraches a pensar cantas veces vas ao baño ao longo do día? Sentes que son poucas ou que che custa moito esforzo expulsar as feces? O estrinximento pode supoñer un grande obstáculo nas nosas rutinas e traer consecuencias moi negativas para o noso benestar. Cando temos que comezar a preocuparnos? Que efectos pode ter para a nosa saúde? Que papel xoga a fisioterapia para esta doenza? Sigue lendo este blog e descubre as respostas.

Malia que o estrinximento é algo polo que pasamos case todas as persoas de forma transitoria, existen sinais que nos poden indicar que estamos a padecer un estrinximento crónico: se defecamos menos de tres veces á semana e se, de facelo, as deposicións son secas, duras e en pouca cantidade.

Que pode ocorrer se isto se alonga no tempo?

• Perdas de ouriño
• Gases
• Inflamación abdominal
• Dores
• Aparición de hemorroides

En casos extremos pode incluso xerar náuseas, falta de apetito, apatía ou mesmo confusión.

Algunhas das causas máis relacionadas coa súa aparición residen nunha baixa presenza de fibra na alimentación, no consumo de pouca auga, na falta de exercicio físico ou tras un parto, pero tamén inflúen os factores psicolóxicos como o estrés.

Dende a fisioterapia, pódese abordar o tratamento do estrinximento sen utilizar terapias invasivas. Deste xeito, adestrar o noso solo pélvico será útil para acadar un ton muscular que nos permita evitar problemas á hora de expulsar as nosas feces. Así, o/a fisioterapeuta tamén poderá ofrecer técnicas e consellos para relaxar o esfínter, empuxar correctamente ou manter unha boa postura á hora de ir ao baño. Neste sentido, situar unha banqueta debaixo dos nosos pés e manter as nosas costas dereitas colocaranos nun ángulo que facilitará a evacuación.

Outro recurso a ter en conta é a masaxe abdominal. Este tratamento busca facilitar o movemento do intestino mediante a aplicación dunha pequena presión no abdome. Coa persoa doente coas pernas estiradas, comézase a facer unha masaxe de intensidade progresiva e con movementos circulares. Para que esta técnica sexa máis efectiva recoméndase que o/a doente beba un vaso de auga e non consuma alimentos nas dúas horas previas á súa realización.

Agora que xa sabes que a fisioterapia é unha moi boa aliada, ¿por que non recorrer a ela se é necesario? En García e Lestón contamos cun equipo de profesionais fisioterapeutas para que o estrinximento non se converta nun pesadelo.