Chegar ao verán si, pero con saúde

Atopámonos no mes de abril, a ben pouco do verán, e xa comezamos a escoitar a necesidade de facer dietas de cara á “operación bikini” para perder uns quiliños.

Dentro destas existe unha gran variedade, pero hai algunhas que ofrecen uns resultados incríbeis en moi pouco tempo e con practicamente nada de esforzo: as dietas milagre. Queres saber en que consisten realmente e por que se consideran tan daniñas?

As dietas milagre prometen perder peso rapidamente pero omiten que a forma en que o conseguen é prexudicial para a túa saúde, tanto física como mental. Ao carecer de fundamento científico poden aumentar o risco de padecer enfermidades cardiovasculares, algúns tipos de cancro e diabetes.

Unha das súas características é que adoitan quitar un grupo concreto de alimentos ou, pola contra, poden basearse no consumo de tan só un. Deste xeito, causan a falta de nutrientes esenciais para o bo funcionamento do organismo, o que incluso pode derivar en trastornos alimentarios como a anorexia ou a bulimia.

Así mesmo, a súa eficacia é temporal pois teñen un efecto rebote logo de rematalas, polo que ao final ganas máis peso do perdido. Isto prodúcese porque o primeiro que elimina o corpo con esta clase de dietas son os líquidos e proteínas, destinados como reserva para as situacións de necesidade.

Igualmente, canto máis rápido adelgazas maior é a probabilidade de que se reduza o músculo e a masa ósea, o que incrementa o risco de sufrir osteoporose.

Se queres baixar de peso, a mellor forma é non suprimir ningún grupo de alimentos, realizar un cambio de hábitos progresivo e acompañalo de exercicio frecuente. Pero o máis importante é acudir sempre a especialistas, os e as dietistas-nutricionistas.

No Centro Integral de Saúde e Benestar García e Lestón, en Arteixo, contamos cunha área específica de nutrición na que che axudaremos a adquirir unhas rutinas axeitadas e sen poñer en risco a túa saúde. Pide cita connosco e goza dunha alimentación personalizada e equilibrada.