Xaneiro é o mes de establecer novos obxectivos e do comezo dos cambios. Por iso, sabemos que este ano 2023 queres facer máis deporte e ter unha vida moito máis activa. Seguro que nestas datas tes moita motivación por lograr os teus propósitos pero, para conseguilo, abonda con ese estímulo? Onde queda a disciplina?

A motivación é un aspecto que está máis relacionado coas emocións que nos provoca realizar algunha tarefa e acadar os seus resultados. Pola contra, a disciplina está asociada coa razón, pois, malia que non teñamos ganas, vemos a tarefa como algo que debemos cumprir.

Con isto non penses que a motivación non é importante. Este sentimento é algo intrínseco a nós e unha ferramenta da nosa mente indispensable para facilitar a nosa adaptación aos cambios. Non obstante, a motivación non se sostén por si soa e somos nós os/as encargados/as de reforzala.

Pola súa banda, a disciplina é o compromiso por realizar e cumprir un traballo, xa sexa físico ou mental, para o cal é necesaria a persistencia, a vontade e unha boa planificación.

Unha das vantaxes da disciplina é que pode facer que acabe aparecendo a motivación. Ter esta educación á hora de adestrar provocará que xeremos unha rutina e que poidamos ver pouco a pouco como logramos os nosos obxectivos, causando así unha sensación de satisfacción co noso traballo.

Con todo, a disciplina pódese adestrar. Como?

• Márcate logros a curto prazo para aumentar a sensación de avance na túa tarefa.
• Facilita os pasos previos ao teu adestramento: se fas exercicio pola mañá, por exemplo, podes deixar a roupa preparada do día anterior.
• Crea unha rutina para espertar a unha hora que che permita facer deporte, traballar e realizar as distintas actividades do teu día a día con tempo.
• Establece horarios cada día da semana para ir a adestrar e ten en conta sempre os descansos.

Podemos dicir, polo tanto, que para alcanzar o éxito é tan necesaria a motivación como a disciplina. Sen a primeira, nunca chegaremos a querer o cambio e sen a segunda, non seremos capaces de cumprir as nosas metas. En García e Lestón podemos ofrecerche un servizo integral de saúde coas nosas áreas de fisioterapia, adestramento, nutrición e psicoloxía para axudarche no teu camiño cara unha vida saudable.

Estamos a piques de rematar o Nadal, unha das épocas máis bonitas e especiais. Non obstante, estas datas tamén poden ser un pesadelo para moitas persoas que padecen un Trastorno da Conduta Alimentaria (TCA).

Unha festividade marcada polas abundantes comidas e ceas son unha gran preocupación para as persoas que sofren este trastorno e nós temos un papel moi importante nas súas vidas. Pode que nos últimos días viras como achegados/as a ti pasaban por esta situación, polo que neste blog ímosche contar que podes facer ti para axudalos/as.

O primeiro que debemos facer é ter empatía pola eles/elas e comprender que o seu trastorno é algo real, importante e que afecta a súa saúde tanto física como mental. Neste sentido, debemos coidar a forma na que nos comunicamos coa persoa doente, non obrigala a comer ou a deixar de facelo e evitar cuestionala con preguntas que poden ser incómodas sobre a súa relación coa comida e o seu comportamento ante esta.

As épocas de Nadal, por exemplo, están protagonizadas por xuntanzas multitudinarias nas que se poden escoitar comentarios que, malia que poidan non ter unha mala intención, repercuten negativamente sobre as persoas con TCA. Cal é o noso consello?

Evita calquera opinión acerca do seu corpo ou o de outros/as, das dietas, da cantidade de comida sobre a mesa ou do exercicio como ferramenta para compensar os excesos destas datas. Coidar a nosa linguaxe é fundamental para calquera tipo de relación social, pero no caso das persoas cun trastorno alimentario, cobra máis importancia, posto que poden desencadear nelas comparacións ou obsesións. Pola contra, é moi favorable que destaquemos aptitudes ou calidades súas fóra do aspecto físico, facerlle saber que nos sentimos orgullosos/as do seu proceso de curación, dos seus avances e o seu esforzo e traballo constante.

Do mesmo xeito, procura propoñerlle plans que non teñan que ver coa alimentación: ir ao cine en familia, pasear, ver as luces de Nadal da cidade… todas son actividades que poden distraer á persoa doente e facer que se esqueza momentaneamente dos pensamentos negativos que roldan pola súa mente.

Padecer un Trastorno da Conduta Alimentaria é todo un reto os 365 días do ano, pero especialmente nestas datas. Non dubides en contar con apoio profesional se te atopas nesta situación ou queres axudar a alguén e non sabes como. En García e Lestón temos ao mellor equipo no ámbito da psicoloxía para todo o que precises.

Chega o Nadal, o frío, as comidas familiares, o turrón e as ganas de quedar sentado/a no sofá vendo unha película. Para moita xente, estas datas son sinónimo de deixar todo atrás.

A actividade física debe ser algo fundamental no noso día a día para poder manter unha vida saudable e non facela pode afectar gravemente á nosa saúde. Non deixes que a preguiza e as baixas temperaturas gañen esta loita! De facelo, podes sufrir as consecuencias. Contámoscho neste blog.

Levar unha vida sedentaria pode facer que perdamos masa muscular e resistencia, que se debiliten os nosos ósos, o metabolismo vese afectado, o sistema inmunitario é menos efectivo, a circulación do sangue empeora, o corpo pode chegar a desenvolver un desequilibrio hormonal, etc. Ademais disto, aumenta o risco de padecer doenzas como a obesidade, infartos, presión e colesterol altos, accidentes cerebrovasculares, diabetes tipo 2, algúns tipos de cancro como o de colon, seno ou útero, osteoporose ou mesmo depresión e ansiedade.

Ademais, aínda que busquemos escusas para non saír da nosa casa a movernos polo frío, facer deporte nestas baixas temperaturas (sempre que non sexan extremas) ten unha serie de beneficios para nós.

• Axúdanos a reforzar o noso sistema inmunolóxico ao aumentar o número de leucocitos e granulocitos.
• Favorece á nosa capacidade cardiovascular, cardiopulmonar e o desenvolvemento dos músculos, posto que o noso corpo debe mellorar o seu rendemento para adaptarse ao frío.
• Practicar deporte en inverno fai que esteamos máis hidratados que en épocas de calor. De todos xeitos, sempre debemos manter unha boa hidratación cando realizamos algún tipo de actividade física.
• Ao facer exercicio nesta época do ano, comezamos a crear unha rutina positiva e chegamos nunha boa condición física aos meses máis calorosos. Ter a costume de realizar actividade física fará que na época de verán, non nos custe tanto movernos.
• Con todo, lembra sempre utilizar prendas que te protexan do frío e che axuden a manter unha boa temperatura corporal para evitar padecer hipotermia, quece os teus músculos e estira antes e despois de cada adestramento, respectivamente.

Traballar cara unha vida saudable debe ser un obxectivo do día a día. En García e Lestón contamos co mellor equipo de profesionais no ámbito do adestramento para facer desta tarefa algo máis sinxelo.

No noso día a día estamos continuamente relacionándonos coa xente que nos rodea, cos nosos/nosas conviventes, coas persoas que traballan nos establecementos ou cos nosos compañeiros e compañeiras de oficio. Por iso, saber comunicarse é fundamental para o noso desenvolvemento persoal e profesional.

En primeiro lugar, antes de coñecer como podemos mellorar a nosa comunicación, é preciso saber cal é a forma máis efectiva de facelo. Ser asertivo/a é ideal se non queremos caer na agresividade ou na pasividade á hora de expresarnos e para transmitir os nosos desexos, opinións e emocións de xeito honesto á vez que prestamos atención á persoa coa que falamos.

Con todo, existen certos pasos que podemos cumprir para mellorar o xeito no que nos relacionamos cos demais: aprender a escoitar, reflexionar o que imos dicir antes de expresalo, permitir ás persoas falar antes, establecer contacto visual con quen estamos a comunicarnos e realizar preguntas.

Pero, é posible ir un paso máis alá? Cunha serie de exercicios podemos potenciar a nosa capacidade de comunicación e tomar conciencia dos nosos erros e das nosas fortalezas para, posteriormente, aplicar esa información nas nosas relacións:

• Os xogos de rol: neles interpretamos o papel doutra persoa (presente ou non) ou mesmo dun personaxe de ficción co obxectivo de comprendelo/a, entender os seus pensamentos, sentimentos e súa forma de actuar. Con este exercicio, desenvolvemos a nosa empatía e a escoita activa.
• Fixarse en como comunican outras persoas da nosa contorna ou en medios e películas permitiranos analizar se as súas técnicas son ou non eficaces e aplicar o que aprendamos no noso día a día.
• Pedir feedback: ter unha opinión externa sempre é beneficioso, axúdanos a saber cales son os aspectos a mellorar da nosa comunicación e cales son os que mellor funcionan.
• Practicar fronte ao espello: ver a nosa forma de expresarnos e o noso movemento físico é esencial para observar e cambiar todo aquilo que non nos guste.

O camiño para mellorar as nosas habilidades comunicativas pode ser longo, mais comezalo é un gran paso para cumprir metas persoais, profesionais e sociais. O equipo da área de psicoloxía de García e Lestón axudarche en todo o posible para logralo.

Algunha vez quixeches facer exercicio de cardio pero non te decantas por un? Pensaches en saír á rúa a facer deporte pero non che gusta moito correr? Prefires camiñar pero non tes a seguridade de poder obter moitos resultados? Pois debes saber que esta idea é errónea e hoxe ímosche explicar cales son as diferenzas reais entre estas dúas actividades para saber cal debes elixir:

Determinar se correr é mellor que camiñar e viceversa depende, principalmente, de tres factores: o aspecto da nosa saúde que queremos coidar, o noso estado físico e, o máis importante, as nosas preferencias individuais. Pode ser que para unha persoa moi activa, correr sexa a mellor forma de liberar endorfinas e sentirse ben pero, para unha máis sedentaria que comeza a facer deporte ou cunha mala condición física, isto pode ser a peor decisión, pois non vai gozar da actividade e a vai vela como un castigo ou unha obriga.

Como diferenciamos os efectos de correr dos de camiñar? Debemos analizar unha serie de aspectos. Se poñemos a atención no noso sistema cardiovascular, ambas actividades son beneficiosas para nós, posto que reducen o risco de exceso de colesterol, hipertensión ou diabetes. Con todo, se camiñamos, deberá ser a un ritmo medianamente intenso, de non ser así, o nivel de gasto de enerxía será moito menor para o noso corpo e os resultados moito menos destacables.

Por outra banda, se queremos priorizar as nosas articulacións, podemos dicir que é preferible camiñar, posto que xeramos menos impacto no noso tren inferior, como os xeonllos e os nocellos. Ademais da intensidade, temos que ter sempre en conta o terreo no que estamos a desenvolver a actividade. Unha superficie moi irregular pode ser prexudicial para nós.

Por último, se abordamos os beneficios psicolóxicos, malia que ambas opcións son recomendables, a acción de correr pode axudarnos máis neste aspecto. Isto é así porque produce unha maior cantidade de endorfinas, unha sustancia que xera o noso cerebro e que se relaciona coa sensación de benestar e o alivio da dor.

Correr e camiñar son dúas grandes alternativas para manternos activos/as e debemos elixir a que máis nos guste e a que máis nos achegue para acadar os nosos obxectivos. Ambas actividades axúdannos a coidar do noso organismo e ter unha vida moito máis saudable. En García e Lestón temos ao mellor equipo de persoas profesionais que poden axudarche a atopar a opción máis óptima e acorde ás túas necesidades para manter activo o teu corpo.