Comezou setembro e moitos e moitas de nós volvemos das nosas vacacións de verán. Esta reincorporación á rutina e ao noso traballo debe ir da man tamén do coidado da nosa saúde. E é que, durante o estío, é común que as persoas descoidemos aspectos como a nosa alimentación, descanso e o exercicio físico, pero non debemos deixar que iso perdure no tempo: é momento de volver a poñernos as pilas.

Con todo, cando falamos de deporte debemos saber que, tras un período de inactividade, non podemos retomar o adestramento coa mesma intensidade que cando o deixamos, posto que podería producir danos na nosa musculatura, articulacións ou mesmo no corazón. O noso corpo precisa volver a adaptarse ao esforzo, polo que é recomendable comezar a adestrar con exercicios de baixo impacto se a nosa condición física empeorou. No blog de hoxe ofrecémosche algúns exemplos:

Agora que volvemos á rutina, son as propias accións do noso día a día as que nos permiten ir acostumándonos ao exercicio: ir facer a compra camiñando, desprazarnos en bicicleta, subir polas escaleiras en lugar de utilizar o ascensor, aproveitar os movementos que realizamos na limpeza da casa, tales como fregar ou varrer, etc.

Por outra banda, podes optar por realizar exercicios como as sentadas (neste post contámosche como debes facelas correctamente para que sexan eficaces e para evitar calquera risco de lesión), pranchas, jumping jacks ou natación.

A natación é un dos deportes máis recomendados para persoas que non estean tan acostumadas á actividade física. Isto débese a que a auga empurra o noso corpo cara arriba, facendo que o efecto da gravidade sexa menor en nós e que os nosos ósos e articulacións teñan que soportar menos presión. Ademais, trátase dun deporte moi completo que nos permite traballar á vez a musculatura dos nosos brazos, tronco e pernas cun baixo risco de lesión. Así, gañaremos forza, resistencia, elasticidade e mobilidade.

Tratemos ben ao noso corpo, de nada serve retomar a actividade física a un nivel de exixencia ao que xa non podemos chegar. Volver a adaptarse ao esforzo non ten nada de malo e é necesario en moitos momentos da nosa vida. En García e Lestón sabémolo ben, por iso contamos con grupos de adestramento funcional nos que, en compañía dunha persoa profesional, poderás volver a facer exercicio acorde á túa condición física partindo de actividades que imitan as accións do noso día a día.

A mentira forma parte da nosa natureza como seres humanos. Todos e todas mentimos algunha vez nas nosas vidas pero, con que finalidade? Es consciente das consecuencias que ten isto para nós ou para a xente que nos rodea? Coñecer estas cuestións pode axudarnos a non recorrer tan habitualmente ás falsas verdades e a que estas non deriven nunha necesidade constante de ocultar a realidade. Permanece atento/a a este blog.

Para comezar, é necesario aclarar que falamos de mentira cando o facemos dun xeito consciente e voluntario. Entón, para que mentimos as persoas? Existen varias razóns:

• Para mellorar a imaxe que ofrecemos aos demais individuos sobre nós mesmos ou mesmas, buscando establecer novas relacións ou acadar un status dentro dun grupo.
• Para agochar información que non queremos que saia á luz porque nos produce vergoña ou porque pode ter consecuencias negativas sobre nós ou os nosos seres queridos.
• Para conseguir algo que nos interesa ou para lograr os nosos obxectivos, xa sexan materiais ou sentimentais.
• Para non facer dano a alguén coa verdade: as coñecidas como mentiras piadosas.
• Para tapar outras mentiras, e é que se di que teñen as patas moi curtas por que as persoas, tarde ou cedo, acabarán por descubrir a realidade. Isto pode obrigarnos a seguir mentindo para evitar que isto se produza, formando un bucle do que é realmente complicado saír.

Con todo, cumpren as mentiras o seu obxectivo a longo prazo? O certo é que, fágano ou non, os nosos actos sempre teñen as súas consecuencias e as falsas verdades poden interferir de xeito moi negativo nas nosas vidas.

Como dixemos antes, mentimos para ocultar información sobre a nosa persoa, un erro do pasado ou para crear unha realidade ficticia coa que nos sintamos máis integrados ou integradas na sociedade. Isto pode colocarnos en situacións que nos desbordan ou que non podemos controlar cos nosos propios recursos. Así, manter estas falsas verdades provocará en nós angustia e ansiedade ante o medo de que nos descubran, chegando incluso a illarnos e a deixar a un lado certas relacións para evitar o risco a ser expostos/as.

E é que, aínda que sexa un acto natural e inherente ao ser humano, mentir moi poucas veces é unha solución válida. Se sentes que as mentiras controlan a túa vida, as persoas profesionais da nosa área de psicoloxía poden axudarche a non enmascarar a verdade e a aceptar a realidade tal e como é.

Que buscas cando adestras? Ante esta pregunta, as persoas podemos indicar múltiples respostas: haberá quen queira que a súa rutina de exercicios sexa o máis eficiente posible, outras persoas decantaranse pola seguridade e a constancia, outras pola rapidez… Ante obxectivos distintos, os métodos tamén deben ser diferentes.

Probablemente tes escoitado en moitas ocasións as siglas HIIT. En que se basea este adestramento? É mellor que o cardio convencional? É realmente tan beneficioso? As respostas, neste blog.

HIIT son as siglas en inglés de Adestramento por Intervalos de Alta Intensidade. Como o seu nome indica, estamos a falar dunha rutina de exercicios fraccionada, que combina momentos de máximo esforzo con momentos de descanso. Así, podemos realizar unha serie de sprints a máxima potencia que duren 15 segundos, alternado con descansos de, aproximadamente, 45 segundos nos que podemos repousar completamente ou camiñar, por exemplo.

Que conseguimos con isto? Para comezar, o HIIT é ideal se queres queimar graxa e non contas con moito tempo, xa que, debido á súa alta intensidade, o recomendable é que estes adestramentos non se alonguen máis dos 15 ou 20 minutos.

Por outra banda, mellorará a nosa saúde cardiovascular, axudando a reducir a presión arterial e a frecuencia cardíaca. Ademais, prodúcese un aumento considerable do noso rendemento, posto que adapta o noso corpo para unha mellor utilización do osíxeno, co que gañaremos resistencia, velocidade e mesmo axilidade.

A simple vista, o adestramento de HIIT pode parecer o método de facer exercicio definitivo, posto que en moi pouco tempo conducimos ao noso corpo a esa ampla gama de beneficios. Con todo, non ten por que servir para todo o mundo, pois tamén ten os seus contras.

Así, desaconséllase para aquelas persoas que padezan unha doenza cardiovascular e para as que non estean acostumadas ao exercicio físico debido á grande intensidade necesaria para realizar esta actividade. Ademais, a rapidez, as repeticións e os movementos explosivos que facemos durante este adestramento poden derivar en lesións no caso de non estar o suficientemente preparados/as.

Neste sentido, o cardio convencional é máis recomendable para aquelas persoas que queiran adaptarse ao esforzo requirido para o HIIT ou para “descansar” destas sesións, posto que só se deberían facer entre 3 ou 4 días á semana e de xeito alterno.

Agora que xa coñeces todo sobre este adestramento por intervalos de alta intensidade, consideras que é para ti? Se precisas prepararte fisicamente para este e outro tipo de actividades, o equipo profesional das nosas áreas de adestramento e fisioterapia axudarache a poñerte a punto!

Tes escoitado falar en innumerables ocasións sobre a alimentación mediterránea e os múltiples beneficios que achega ao noso organismo. Con todo, na propia Península Ibérica temos máis opcións coas que gozar dunha nutrición saudable e saborosa como é a alimentación atlántica, tamén estendida en países como Francia ou Inglaterra.

E é que se es de Galicia, Asturias, o norte de Portugal, Cantabria ou o País Vasco, de seguro que xa aplicas a alimentación atlántica en moitos pratos que consomes no teu día a día, pero, coñeces todos os seus segredos?

Tanto se estás algo familiarizado/a con esta alternativa, como se procedes doutras zonas máis vinculadas a outros estilos de alimentación, debes saber que a atlántica aposta polos produtos traídos do mar e da terra. A Fundación Dieta Atlántica danos unha serie de recomendacións para o seu consumo:

• Pescados e mariscos unhas tres ou catro veces por semana.
• Cereais, patacas e legumes en abundancia.
• Froitas e hortalizas, como repolo ou grelo, habitualmente.
• Leite e derivados como o queixo a diario.
• Viño e carne de cocho, vacún, caza ou aves de xeito moderado.

Outra das súas características máis importantes é a relevancia que teñen no menú os alimentos de tempada e de produción local, co que non só se conseguen produtos máis frescos e menos procesados, senón que se logra reducir o seu impacto sobre o medio ambiente.

Así mesmo, o xeito de cociñar estas receitas tamén estará estreitamente vinculado a esa procura da alimentación saudable, alterando o mínimo posible a materia prima e evitando a graxa. Polo tanto, estas receitas faranse á prancha, cocidas, nun guiso e usando aceite de oliva tanto para cociñar como para aderezar.

Que beneficios achega ao noso organismo a alimentación atlántica? Os alimentos que a compoñen, especialmente o pescado, contan cun alto contido en ácidos graxos omega 3, vitamina D e minerais como o calcio, moi importantes á hora de coidar o noso corazón e previr doenzas cardiovasculares. Do mesmo xeito, mellora o noso tránsito intestinal grazas á fibra, presente nos cereais, legumes, verduras ou froitas e reduce o risco de padecer diabetes ou colesterol ao contar cunha gran presenza de hidratos de carbono.

Agora que xa o sabes todo sobre a alimentación atlántica, por que non darlle máis importancia no noso menú semanal? Se tes calquera dúbida ou precisas de axuda para encamiñar os teus hábitos, as persoas profesionais da área de nutrición de García e Lestón axudaranche en todo o que precises.

Calor, vacacións, reunións con amigos e amigas… Para moitas persoas o verán é unha época do ano na que o exercicio muda a ser algo secundario e mesmo esquecido na rutina diaria. A actividade física é fundamental para o coidado do noso benestar sexa a estación que sexa e deixala completamente de lado pode ser fatal para a nosa saúde. Queres saber como nos afecta? Contámoscho neste blog:

Para comezar, a nosa musculatura é a que sofre unha das consecuencias máis inmediatas de non facer deporte. A atrofia muscular non só pode manifestarse co paso dos anos, tamén o fará se non utilizamos os músculos. Así, estes perderán forza, volume e flexibilidade, chegando a dificultar moito a realización de certas actividades do día a día.

Por outra banda, ter unha vida moi sedentaria incrementará o risco de obesidade e de desenvolver algunha doenza cardiovascular. Isto ocorrerá porque o noso corazón non estará acostumado ao esforzo e non bombeará tan ben o sangue do noso corpo, encargado de transportar o osíxeno e os nutrientes ao resto de órganos. Así, se non facemos exercicio, teremos moitas máis posibilidades de padecer problemas de circulación, colesterol, presión arterial alta ou mesmo infartos.

Do mesmo xeito, o noso metabolismo tornará máis lento. Por que ocorre isto? Ao estar en forma e ter unha musculatura traballada, esta precisará e gastará  máis enerxía para funcionar. Por esa mesma razón, ter unha vida activa tamén evitará que aumente o noso nivel de azucre no sangue, reducindo a posibilidade de padecer diabetes.

Ademais, facer exercicio tamén é fundamental para o coidado da nosa pel. Ao suar, estaremos eliminando toxinas do noso corpo, o que axudará a que o noso órgano máis grande teña menos risco de desenvolver engurras, manchas e demais sinais de envellecemento.

Con todo, deixar de facer deporte tamén afectará negativamente á nosa saúde mental. Algunha vez escoitaches o dito de “mens sana in corpore sano”? A actividade física favorecerá a produción de endorfinas, as coñecidas como hormonas da felicidade, polo que contribuirá a reducir o risco de padecer doenzas como o estrés, a ansiedade ou a depresión, axudando mesmo a mellorar a nosa autoestima.

Agora que xa sabes o importante que é manternos activos/as para a saúde, seguro que non pensas deixar o deporte de lado neste verán. A nosa área de adestramento é o lugar indicado se queres comezar a facer exercicio. Os nosos grupos de adestramento funcional adáptanse á túa condición, sexa a que sexa, axudándoche a desenvolver dun xeito correcto os movementos do teu día a día.