Na pantalla e fóra dela, estes días ninguén fala doutra cousa: as redes sociais e os medios de comunicación enchéronse de imaxes de cidades que, contra todo prognóstico, se atopan cheas de neve. E con todas estas nevadas inesperadas chegaron tamén os vídeos con algún que outro escorregón.

En Galicia vimos tamén importantes xeadas, así que todo isto lévanos a pensar inevitablemente nunha das nosas áreas: a fisioterapia, unha disciplina básica nestes casos.

Frío ou calor? Repouso ou movemento? Hai preguntas que só pode contestar un especialista e, como sabes, unha caída pode quedar nunha simple anécdota ou, pola contra, supoñer algo máis grave: mazaduras, luxacións ou mesmo fracturas.

Cando acodes a un especialista, coma os que temos na área de fisioterapia do Centro Integral García e Lestón en Arteixo ou na sede do Club do Mar de San Amaro en A Coruña, realizaremos un primeiro exame no que valoraremos os danos e estipularemos cal será o proceder para solucionar o teu problema.

Poderías caer no erro de pensar que cando non se produce unha rotura de ósos a lesión deixa de ser grave, mais o certo é que este tipo de doenzas poden ser moito máis nocivas para o corpo.

A forma de actuar, coma en todo, varía en función do golpe e máis do paciente, co que podemos aplicar diversas alternativas:

 

• Rehabilitación de distintas zonas do corpo.
• Exercicios que contribúan á mobilidade ou o fortalecemento do lugar afectado.
• Masaxes terapéuticas.
• Estiramentos.

 

E ollo, porque a tentadora frase “Non fago máis os exercicios que me mandou o meu fisioterapeuta porque xa estou ben” é un erro total.

Se xa nos coñeces saberás que somos partidarios desa filosofía de que vale máis previr que curar, así que lembra que hai unha área da fisioterapia que se ocupa da prevencións das caídas, sobre todo en persoas maiores.

Nelas, o primeiro paso será realizar unha avaliación do risco para continuar cos exercicios personalizados de cada paciente, nos que, sobre todo, se traballa o equilibrio e a coordinación, realizando ademais adestramento de forza, resistencia ou movemento articular.

En García e Lestón non queremos que unha caída, e moito menos debido a Filomena, poida arruinar o túa día a día. Por esta razón, contamos con especialistas en nutrición, fisioterapia, psicoloxía ou adestramento que farán que nada te pare… nin Filomena, nin as nevadas nin as xeadas.

 

Este Nadal, nin te pases nin te cortes

Na véspera de Noiteboa seguramente xa teñas planificada a cea dese día e a comida de Nadal. Son días de preparacións máis coidadas, mariscos, peixe, carnes e, por suposto, os doces típicos nas longas sobremesas. Desta vez non imos marcarche o menú, pois estas festas están para gozar da familia, aínda que neste atípico Nadal sexamos menos á mesa, e da gastronomía. 

Dende o Centro de Saúde e Benestar García e Lestón Fisioterapeutas queremos que nin te pases, nin te cortes. Simplemente desexamos que estes días, e sempre, teñas unha relación sa coa comida, permitíndote gozar dun menú especial sen remordementos. Se non hai contraindicación médica, podes comer de todo con moderación, que o importante é buscar o equilibrio entre saúde física e mental!

Toma nota destes consellos para gozar dun Nadal máis saudable:

1. Planifica o calendario e as comidas da festa. Marca os días que vas ter comidas copiosas e asume que eses días podes excederte mentres que o resto xa sabes que non. Tamén che recomendamos que organices ben as comidas deses días para que merques os produtos xustos e non queden sobras que te sintas obrigado a comer os días que non son de festa.
2. Come amodo. Sé consciente mentres inxires alimentos e saborea cada bocado. Goza do sabor, da textura, dos aromas… Ademais, mastigando amodiño recoñecerás facilmente a sensación de saciedade. En cambio, se devoras rápido acabarás consumindo máis cantidade da recomendada.
3. Modera o consumo de alcol. Non che vai facer mal un brinde con champaña nin unha copa de viño, mais controla a cantidade. É conveniente que só acudas a el nas ocasións especiais.
4. Bebe moita auga. É importante consumir ao menos un litro e medio de auga ao día para manter o corpo hidratado. Ademais, será a nosa aliada para eliminar toxinas estes días!
5. Controla o consumo de azucre. Sabemos que é difícil evitalo nestas festas pero convidámoste a consumir os doces de Nadal só nos días sinalados: Noiteboa, Nadal, fin de ano e Reis. Que che parece? Un pouco turrón e uns bombóns abondarían. Non fagas máis sobremesas (ou corres o risco de que che sobren para máis días).
6. Realiza exercicio moderado. Todos os días, incluídos os sinalados como festa no calendario, mantén unha rutina de exercicio. Se non es unha persoa moi activa, cando menos sae a pasear durante unha hora.

Queres empezar o 2021 aprendendo a comer saudable? Precisas cambiar de hábitos? En Centro de Saúde e Benestar García e Lestón Fisioterapeutas en Arteixo (A Coruña) contamos cun equipo de nutrición para asesorarte. Pide cita e comeza a sentirte mellor. Non hai mellor plan para despedir este 2020! 

Chega o Nadal, unha época do ano na que as emocións están a flor de pel, moitas delas positivas como os reencontros, as rúas engalanadas coa maxia do Nadal, as ceas e sobremesas inmellorables ou os nenos gozando coa mellor das ilusións. Pero tamén é certo que notamos os ocos baleiros: aqueles que xa non están ou cos que non nos podemos xuntar polas circunstancias.

Pero somos persoas que nos adaptamos, xa o fixemos unha vez en marzo e agora o repetirémolo: distancia, illamento, grupos pequenos… poñendo da nosa parte podemos facer fronte ás situacións máis complexas e incluso enriquecernos no camiño. Hoxe dende a área de psicoloxía do Centro de Saúde e Benestar García e Lestón queremos achegarvos algunha recomendación que convide a ese cambio de mirada, a pór o foco na parte positiva e dar un paso máis que rompa coas propias barreiras mentais, permitindo gozar da situación que virá e poder combater o sufrimento emocional facendo que este nadal non deixe de brillar:

• Acepta a situación actual que estamos a vivir. Asimila a realidade e non crees expectativas en base aos desexos ou crenzas individuais.
• Intenta anticiparte mentalmente ás circunstancias para poder transmitirlle información a nenos, persoas maiores, adolescentes…
• Autocoñecemento e aprendizaxe: reflexiona sobre os propios avances persoais.
• As celebracións íntimas son unha moi boa opción. Goza daquelas persoas coas que si podes estar e non renuncies á esencia que para ti ten o nadal.
• Fai deste un nadal propio e persoal, libre de esixencias e formalismos sociais. Explora que che fai sentir ben e que aspectos son para ti importantes nestas datas.
• No caso de menores na familia, achegarlles seguridade e claridade a través da comunicación e o afecto. Fala sobre como serán estas datas, non amoses excesiva preocupación e goza do tempo en familia.
• Esfórzate! O cambio de actitude require da nosa implicación. Así que vence a pereza e actúa, promove emocións positivas!
• Valora os pequenos detalles: a decoración, os paseos cotiáns, as conversas cos teus seres queridos…
• Síntete orgulloso polo esforzo de facer as cousas ben: por protexerte a ti e aos teus, polo compromiso social e pola responsabilidade que temos en todo isto.

Se a pesares destes conselliños non consegues manter lonxe o desánimo para este Nadal distinto, podes poñerte en contacto co noso servizo de psicoloxía. Que sexan unhas festas diferentes non quere dicir que vaian ser peores. Adoptar outra mirada depende de nós!

 

Este martes é o Día Internacional do Dietista-Nutricionista, e que menos que dedicarlle unha entrada para pór en valor unha serie de aspectos moi estendidos que distorsionan a realidade sobre esta profesión desvalorizándoa e rodeándoa de mitos.

Primeiro de todo, é importante que deixemos claro o que non é un dietista-nutricionista. Non é alguén que che axude na “operación bikini” deste ano. Non é alguén que che venda pastillas nin suplementos. Non é alguén que fai o seu traballo igual para calquera paciente, independentemente da idade, estatura ou hábitos. Non é alguén que che axude a conseguir unha rápida perda de peso. Non é alguén quen che di o que é bo ou malo, senón en que cantidades … Abraiado? Ben, pois aínda non o sabes todo.

Poñamos en valor os tipos de nutricionistas que podemos atopar: en función da clase da que se trate, terá unhas funcións ou outras:

• Nutricionista clínico/a. Cantas veces escoitamos falar de que as mulleres embarazadas non poden consumir determinados alimentos? Ou esa “dieta branda” para cando o noso estómago está en folga? Este/a profesional adaptará a dieta das persoas segundo as súas necesidades fisiolóxicas, persoais, socioeconómicas, relixiosas e culturais.
• Nutricionista en saúde pública ou comunitaria. Céntrase na prevención e promoción da saúde baseada na alimentación coa adopción de xeito sostido de hábitos saudables.
• Nutricionista en restauración colectiva. Encárgase de formar ao persoal de servizos de alimentación sobre seguridade alimentaria, planificar menús ou avaliar o balance nutricional do subministro de alimentos.
• Nutricionista na industria. Encárgase da innovación de produtos e do márketing social ao seu redor.
• Ensino nutricionista. A moitos de nós de seguro que nos gustaría ter recibido unha boa charla sobre comer e ter un estilo de vida saudable, pois el ou ela sería o encargado ou encargada de impartila.
• Nutricionista investigador/a. Promove os estudos científicos na área da alimentación, nutrición e saúde.

Agora xa o sabes, os/as dietistas-nutricionistas non van pór en risco a túa saúde co fin de que perdas uns quilos antes do verán e tampouco se van lucrar coa venda de alimentos inadecuados. Axudaranche a romper todos eses mitos que rodean a comida e ensinaranche hábitos alimentarios que farán o teu día a día moito máis saudable. Achégate ao Centro integral de saúde e benestar García e Lestón e axudarémosche a romper con todos os teus estereotipos e, o que é aínda máis importante, a adquirir unhas rutinas para sempre.

A Real Academia Española define os prexuízos como: “opinión previa e tenaz, normalmente desfavorable, sobre algo pouco coñecido“. Así e todo, temos que recoñecer que todos fomentamos nalgún momento o dito de “cría a fama e bótate a durmir” engadíndolle, de xeito erróneo, etiquetas a todo o que nos rodea: “Marcos, o frío”, “aplicación lenta”, “a prexudicial rede social ”… Afortunadamente, todo ten a capacidade de evolucionar e deixar atrás estigmas que impiden o progreso ou o crecemento, algo do que en García e Lestón Fisioterapeutas somos plenamente conscientes.

En relación coa saúde mental, a cultura na que vivimos ten grandes prexuízos asociados a ela, ata o punto de convertela nun tema tabú. Por que non acudir a un psicólogo se o vexo necesario? Son violentas as persoas que van ao psicólogo? Ou é só porque están tristes? Este tipo de preguntas, máis comúns do que nos gustaría, conducen a esta estigmatización e hai que combatelas con información. Verías con vergoña ou culpa ir ao oculista se creo que non vexo como debería? Rotundamente non.

Por todo isto, queremos falar un pouco sobre a imposición de etiquetas sobre factores relacionados coa saúde mental, máis concretamente, co seu diagnóstico.

Todo profesional da saúde realiza entrevistas, probas ou avaliacións para chegar a un diagnóstico que categorice o estado das persoas. É bo poñer esta etiqueta? No caso da saúde mental, hai moitos máis perigos e limitacións que os beneficios ou aspectos positivos que trae.

Dende o punto de vista da persoa, algúns termos técnicos poden impresionarnos e desinformarnos, polo que a mellor estratexia sería mostrar empatía e propor solucións.

Nese senso, non podemos esquecer que a imposición de etiquetas pode levar a un efecto Pigmalión, especialmente nos máis novos. Cando alguén nos “marca”, establece o que espera de nós e, dado que moitas das nosas accións dependen das expectativas dos que nos rodean, as nosas capacidades serán limitadas.

Dende o punto de vista profesional, debemos centrarnos en cal será a mellor forma de traballar. Se non se establecen etiquetas, a terapia será máis flexible e adaptarase ás necesidades dos pacientes en cada momento.

Non obstante, lembra sempre esa máxima de “unha mente sa nun corpo san”: na nosa área de Psicoloxía do Centro Integral de Saúde e Benestar García e Lestón queremos axudarche a cumprilo escoitándote, entendéndote, axudándoche a avanzar e deixar atrás as etiquetas.