Chegou o momento. Estás disposto/a a comezar a adestrar para lograr un cambio físico. Chegas ao ximnasio e… Agora que? Que quero conseguir e que exercicios debo realizar para alcanzar a miña meta?

Normalmente, as persoas que comezan a practicar deporte fano con dúas principais finalidades: perder graxa ou exercitar a musculatura. Existe a crenza de que hai determinadas actividades enfocadas a cada unha das dúas metas, pero non todo é tan sinxelo como parece. Cales son?

• Os exercicios de cardio (cardiovasculares), que son aqueles destinados ao aumento do noso ritmo cardíaco para perder peso: correr, montar en bicicleta, nadar, saltar á corda, etc.
• Os exercicios de forza, que buscan desenvolver, definir e gañar masa muscular.

Con todo, non existe ningunha fórmula máxica que nos diga que actividades temos que seguir para alcanzar unha destas dúas finalidades, xa que temos que reparar no gasto calórico que estamos a facer.

Por unha banda, os exercicios de cardio axudarannos a queimar máis calorías de forma inmediata, pero o noso metabolismo irase adaptando ao esforzo co paso do tempo, diminuíndo o ritmo deste gasto. Pola outra, o adestramento de forza tamén nos axudará a perder calorías, pero dun xeito máis lento e prolongado no tempo. Por que?

Canto máis desenvolvamos os nosos músculos, máis gasto de enerxía van precisar, polo que traballar a nosa musculatura implicará tamén un aumento no déficit calórico.

Polo tanto, a chave para un bo adestramento residirá en intercalar, na medida do posible, estes dous tipos de exercicios. Cal facer primeiro? Dependerá do noso obxectivo:

• Se o que buscamos é perder peso ou gañar resistencia, o máis aconsellable será comezar por unha sesión de cardio para despois utilizar os exercicios de forza como complemento a esa queima de graxa.
• Polo contrario, se queremos aumentar a masa muscular, o adestramento de forza deberá ser o que vaia en primeiro lugar para non esgotar toda a nosa enerxía cos exercicios aeróbicos.

Vaia o que vaia de primeiro, unha cousa está clara: complementar ambas actividades fará que as nosas sesións de exercicio sexan máis eficaces, tanto para perder peso como para gañar músculo.

Cómpre recordar que, xunto ao deporte, sempre debemos facer un seguimento e coidado da nosa alimentación. Unha nutrición saudable e variada sempre suporá un empuxón nos nosos obxectivos físicos.

Agora xa o sabes, a perda de graxa non ten por que ser incompatible co desenvolvemento muscular nin viceversa. Recorda que para unha maior seguridade, sempre é recomendable acudir a unha persoa profesional que valore o noso estado físico e nos guíe na realización da actividade. Na nosa área de adestramento temos ao equipo perfecto para botarche unha man.

Na sociedade actual semella que para ser felices e sentirnos completos/as debemos traballar máis horas, comezar novos proxectos, encher e encher a nosa axenda con actividades ao longo do día…

Coa pandemia, esta necesidade de sentirnos produtivos/as incrementouse ante a imposibilidade de realizar os plans que, anteriormente, eran o día a día. Cociñar novas receitas, apuntarse a cursos, comezar a aprender novos idiomas, montar mobles, etc. Todo isto está xenial, pero non é necesario facelo todo á vez nin depender diso para sentirnos ben, temos que aprender a valorar o descanso.

Se nos atopamos nesta situación, o máis probable é que non teñamos tempo no día para facer todo o que nos gustaría. Que provoca isto? A insatisfacción por non lograr o proposto pode converterse en ansiedade ou mesmo depresión. Centrarnos moito no noso traballo, por exemplo, pode producir en nós unha serie de efectos negativos que se coñecen, comunmente, como a Síndrome do Traballador Queimado.

Esta doenza orixínase por un alto nivel de estrés, autoesixencia, moita carga de traballo, que as labores a realizar non cumpran coas expectativas… Isto fará que desenvolvamos un sentimento negativo cara o noso posto e que, ademais de derivar en síntomas psicolóxicos como a depresión ou irritabilidade, pode causar esgotamento físico, dores musculares ou mesmo problemas no noso sistema dixestivo. E é que vivir ocupados/as sen tempo para descansar e para o ocio pode facer incluso que descoidemos as nosas relacións persoais ao non poder contar co tempo necesario para atendelas.

Se o traballo non se apodera de todas as horas do noso día, seremos máis eficientes no momento no que nos dediquemos a el por completo. Pero como logramos esta desconexión?

• Facer exercicio para rebaixar os niveis de estrés e nerviosismo.
• Pasar máis tempo cos nosos seres queridos para evitar apartarnos da nosa contorna.
• Diminuír a cantidade de tempo que estamos co noso móbil e nas redes sociais, posto que nos poden conectar de novo co traballo e a produtividade.
• Realizar unha actividade que nos guste: ler, ver unha serie, pintar…
• Crear espazos para dividir fisicamente as localizacións nas que traballamos e nas que descansamos.

Finalmente, para que estes consellos che resulten de axuda, debes ser consciente de que todos e todas nos merecemos parar e pasar un momento agradable. Non valemos menos por desconectar do traballo cando rematamos a xornada, nin estamos a perder o tempo se usamos as nosas horas libres para ver unha película en lugar de adiantar tarefas.

Con todo, contar co apoio dunha persoa profesional da psicoloxía pode supoñer ese empuxón que necesitamos para gozar máis do noso descanso. En García e Lestón podemos axudarche en todo o que precises para que o traballo e a produtividade non dirixan a túa vida.

De seguro que algunha vez comezaches a practicar deporte sen facer un quecemento previo. Estes exercicios resultan de moita importancia non só para evitar lesións, senón tamén para facer da actividade física algo máis efectivo e obter dela mellores resultados. Sorprendentemente, a pesar dos evidentes beneficios que trae consigo o quecemento e a volta á calma, é algo que moitas persoas deixan de lado no seu día a día. No blog de hoxe ímosche explicar por que iso é un erro que debes solucionar canto antes.

Para comezar, imos deixar as cousas claras. Chamamos quecemento ao conxunto de exercicios que realizamos durante 15-30 minutos antes da actividade física e que preparan ao noso organismo para o esforzo que está a piques de realizar.

Que nos achega o quecemento?

• Aumenta a nosa frecuencia cardíaca e respiratoria.
• Mellora a nosa flexibilidade e resistencia.
• Fai que chegue máis osíxeno á nosa musculatura.
• Incrementa a elasticidade e a capacidade e forza de contracción dos músculos.
• Facilita a coordinación dos nosos movementos.
• Axuda a controlar o estrés e a ansiedade que podemos sentir nos momentos previos a unha competición.

Sempre debemos quecer de forma progresiva, aumentando a intensidade a medida que o noso corpo se vai poñendo a punto. Así pois, é importante que, nun primeiro momento, nos centremos en exercitar as nosas articulacións. De seguido, exercicios de estiramento para os nosos músculos e cardio para aumentar as nosas pulsacións.

Que consecuencias negativas pode ter non quecer? A máis evidente e o aumento do risco de sufrir lesións nas nosas articulacións, pero as fracturas e os desgarres musculares tamén poden supoñer un factor a ter en conta. Por outra banda, e como che adiantabamos antes, o benestar psicolóxico tamén se ve beneficiado polo quecemento, aumentando a nosa concentración e motivación.

Con todo, a volta á calma despois da nosa sesión de deporte é tan fundamental como un quecemento. Para axudar ao noso corpo a arrefriarse deberemos realizar unha serie de actividades nas que a intensidade sexa decrecente. Por exemplo, se estamos correndo, para finalizar é recomendable non parar en seco e ir diminuíndo o noso ritmo ata chegar a unha velocidade na que poidamos camiñar. Deste xeito baixaremos a nosa frecuencia de pulsacións e evitaremos posibles dores musculares.

Agora xa sabes todo o que tes que realizar antes e despois de cada sesión de exercicio para que as lesións non sexan unha dor de cabeza constante. En García e Lestón temos ao mellor equipo nas nosas áreas de fisioterapia e adestramento para que o quecemento e a volta a calma non sexan unha incógnita para ti nunca máis.

É ben coñecido por todos e todas nós que nestes dous anos de pandemia as nosas vidas deron un xiro de 180 graos. Agora semella que cada vez estamos máis preto do final deste maratón, pero as condicións que tivemos que afrontar todo este tempo como o confinamento, as clases virtuais ou o teletraballo teñen as súas consecuencias sobre o noso estado de ánimo e benestar psicolóxico.

Con todo, son os nenos/as e adolescentes os/as que se atoparon cun muro moi difícil de escalar que se interpuxo no camiño ás súas metas, ambicións e relacións persoais, aspectos moi importantes para o seu desenvolvemento. No blog de hoxe falaremos de como a COVID-19, e todo o que a rodea, puido ou pode estar afectando aos máis pequenos e pequenas da casa.

Para comezar, é necesario que nos poñamos en contexto para ser completamente conscientes da problemática actual. Grazas a un informe realizado por Save the Children, chamado Crecer Saludable(mente). Un análisis sobre la salud mental y el suicidio en la infancia y la adolescencia, sabemos que os trastornos mentais en nenos/as e adolescentes se triplicaron coa chegada da pandemia.

Sentimentos como o medo, a inseguridade, a tristeza, trastornos de ansiedade, depresión ou mesmo aqueles relacionados co sono aumentaron nos últimos meses debido a, entre outros factores:

• Perda de familiares e non poder acompañalos/as nos seus últimos días.
• Rematar relacións de amizade ou amorosas pola falta de contacto.
• Despedirse de oportunidades académicas.
• Problemas económicos na familia.

Ademais, os trastornos da conduta alimentaria tamén se viron incrementados grazas á atención que se poñía en moitos fogares sobre a comida e o peso ante a rutina sedentaria do confinamento.

Do mesmo xeito, o ciberacoso é un perigo aínda máis presente do que o era antes da chegada da COVID-19 debido ao aumento do uso de internet e das redes sociais por parte dos e das adolescentes.

Incluso tivo un impacto negativo sobre os rapaces e rapazas con trastorno do espectro autista, xa que presentan máis dificultades ante os cambios de rutina, deixando de recibir os coidados, terapias e actividades que formaban parte do seu día a día.

Estas condicións que atravesaron as persoas máis mozas e que aínda están a sufrir en certos casos, levaron a que se rexistrara tamén un aumento nas autolesións e nas tentativas de suicidio.

Como podes ver, a pandemia golpeou de xeito moi duro aos nenos/nenas e adolescentes. Os pasados meses foron moi difíciles, por iso resulta de especial importancia que recoñezamos esta realidade e que busquemos apoio psicolóxico para nós ou para os nosos seres queridos no caso de precisalo. Grazas á área de psicoloxía de García e Lestón poderemos axudarche en todo o que precises.

Sabémolo, facer exercicio pode chegar a ser unha tarefa non moi doada para moitas persoas que non acostumen a estar en movemento ou que non teñan unha vida moi activa. Se comezar a practicar deporte xa pode ser complicado, manternos constantes nesa empresa ao longo do tempo pode selo aínda máis. Con todo, existen moitas chaves para ver a actividade física dun xeito máis atractivo e hoxe ímosche falar dunha ben interesante, a compañía.

Cando adestramos sos/soas é común que a nosa motivación se vexa reducida pouco a pouco ao non contar cunha persoa ao carón que nos empurre a continuar coa nosa rutina cando o ánimo está polo chan. E é que ao facer exercicio en parella ou en grupo créase unha dinámica na que uns membros apoian aos outros.

Do mesmo xeito, e en relación á motivación, a actividade física en compañía doutras persoas tamén potenciará a nosa competitividade. Quen non quixo nunca comprobar se aguanta unhas repeticións máis que o seu amigo ou amiga ou se chega en primeiro lugar á meta nunha carreira? Esta competición sa entre compañeiros e compañeiras fará do deporte unha actividade moito máis divertida e reconfortante.

Pola súa banda, practicar un deporte en grupo como o fútbol ou o baloncesto tamén nos proporciona moitos beneficios a nivel social e mental. Traballar en equipo, comprender as necesidades e as virtudes da persoa que temos ao noso carón, desenvolver a capacidade de liderado ou saber cando apoiarnos nos demais son aspectos que vemos potenciados grazas á cooperación que require este tipo de actividades.

Ademais, adestrar en compañía é un bo xeito de coñecer a xente, ampliar as nosas relacións ou mesmo de crear novos vínculos no noso día a día. Xuntarse con outras persoas especificamente para facer deporte pode resultar de moita axuda para aqueles/aquelas ás que lles custe relacionarse, favorecendo a integración, o sentimento de pertenza a un grupo e incluso mellorando a autoestima.

Como podes comprobar, o exercicio en grupo é unha gran ferramenta para combater a preguiza e pasar un momento entretido mentres te mantés activo/activa. Non hai escusas para deixar de lado o adestramento sen loitar polas nosas metas, e en boa compañía o resultado está garantido. En García e Lestón contamos con clases grupais para que goces da actividade física ao carón doutras persoas, cumprindo coas medidas sanitarias e da man do mellor equipo de profesionais.